भांगरभूंय | प्रतिनिधी
मंत्रिमंडळ बसकेंत घेतलो निर्णय
पणजी : म्हजें घर येवजणे खाला येवपी विवीध जमनी नियमीत करपा खातीरचें दर मंत्रिमंडळ बसकेंत थारायलां. हे प्रमाण 1972 आदले ते 2014 मेरेनच्या घरांक विवीध दर आकारतले. हे विशीं बेगीनूच अधिसुचवणी काडटले. हे खातीरचे अर्ज 4 ऑक्टोबर सावन उपलब्ध जातले अशें मुख्यमंत्री डॉ. प्रमोद सावंत हांणी सांगलें. मंगळारा मंत्रिमंडळ बसके उपरांत तांणी माध्यमां कडेन संवाद सादलो. ह्या वेळार येणावळ मंत्री बाबुश मोन्सेरात, सचीव संदीप जॅकीस हजर आशिल्ले.
सरकारी जमनीचेर 1972 आदल्या घरांक सनद घेवपा खातीर प्रती चौरस मीटर 25 रुपया शुल्क भरचे पडटले. 1973 ते 86 मजगतींच्या घरांक प्रती चौरस मिटर सर्कल रेट म्हळ्यार उण्यात उणें जमीन दराची 50 टक्के रक्कम, 1987 ते 2000 मजगतींच्या घरांक सर्कल रेटच्या 75 टक्के, जाल्यार 2001 ते 2014 मजगतींच्या घरांक उण्यात उणी सर्कल रेट प्रमाणूच रक्कम भरची पडटली. हे खातीर सरकारान 2014 वर्सा अधिसुचीत केल्लें सर्कल रेट गृहीत करतले. खंयच्याय प्रकरणांत सर्कल रेट 50 रुपयां परस उणें आसचें ना.
कोमुनिदाद जमनीवेलीं घरां कोमुनिदादचे परवानगेन नियमीत करतले. हे खातीर घेवपी शुल्क आनी दंडाची सगली रक्कम कोमुनिदादीक दितले. 1972 आदलीं घरां नियमीत करपा खातीर प्रती चौरस मीटर 25 रुपया चड शुल्काच्या 20 टक्के रक्कम दंड म्हणून आकारतले. 1973 ते 86 मजगतींच्या घरांक प्रती चौरस मिटर सर्कल रेट म्हळ्यार उण्यात उणे जमीन दराच्या 50 टक्के चड 20 टक्के दंड, 1987 ते 2000 मजगतींच्या घरांक सर्कल रेटच्या 75 टक्के चड 20 टक्के दंड, जाल्यार 2001 ते 2014 मजगतींच्या घरांक उण्यात उणें सर्कल रेट चड 20 टक्के दंडाची रक्कम भरची पडटली, अशें मुख्यमंत्र्यान सांगलें.
मंत्रिमंडळ बसकेंत जाल्ले हेर निर्णय
अमित शहा हांचे हस्तुकीं 18 प्रकल्पांची पायाभरणी
4 ऑक्टोबराक गृहमंत्री अमित शहा हांचे हस्तुकीं म्हजे घर येवजणेचें उक्तावण जातलें. हे खातीर दरेके पंचायतींतल्यान कदंब बसची वेवस्था केल्या. शहा हांचे हस्तुकीं 18 प्रकल्पांची व्हर्चुअल पद्धतीन पायाभरणी जातली. ह्या वेळार गोंय मनुष्यबळ विकास महामंडळ आनी मेढवी विद्यापीठांत समजिकाय कबलात जातली, अशें मुख्यमंत्र्यानी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
