युवा वेव्हार आनी खेळां मंत्रालयान खेळां पुरस्कारा खातीर अर्ज मागयल्यात

भांगरभूंय | प्रतिनिधी

नवी दिल्ली, खबरां संस्था: खेळां मळावेले उत्कृश्ट कामगिरीक तोखेवपाक आनी इनामां दिवपा खातीर दर वर्सा खेळां पुरस्कार भेटयतात. मेजर ध्यानचंद खेलरत्न पुरस्कार खेळां मळार अद्भूत आनी उत्कृश्ट कामगिरी खातीर दितात. खेळगड्यांक सेगीत केल्ले उत्कृश्ट कामगिरीक लागून अर्जुन पुरस्कार दितात; खेळां उदरगतींत आजीवन योगदान दिल्ले खातीर अर्जुन पुरस्कार (आजीवन साध्यताय) दितात; द्रोणाचार्य पुरस्कार प्रतिश्ठीत आंतरराष्ट्रीय खेळां सर्तीं खातीर पदक जैतिवंत निर्माण करपी प्रशिक्षकांक भेटयतात, राष्ट्रीय खेळ प्रोत्साहन पुरस्कार (आरकेपीपी) देशांतल्या खेळांचो प्रसार आनी विकासांत म्हत्वाचो वांटो आशिल्ल्या कॉर्पोरेट संस्थांक (भौशीक/खाजगी) आनी बिगर सरकारी संघटनांक (एनजीओ) दितात. ह्या पुरस्कारांच्या येवजणेची प्रत मंत्रालयाची वेबसायट www.yas.nic.inचेर पळोवंक मेळटा.
भारत सरकाराचें युवा वेव्हार आनी खेळां मंत्रालय दर वर्सा खेळां पुरस्कारा खातीर अर्ज मागयता. ह्या खेळां पुरस्कारांक 2025 वर्सा खातीर अर्ज मागोवपाच्यो सुचोवण्यो www.yas.nic.in वेबसायटीचेर अपलोड केल्यात.
संबंदीत पुरस्कारां खातीर पात्र खेळगडे/प्रशिक्षक/संस्थां कडल्यान अर्ज मागयल्यात. हे खातीर एका समर्पीत पोर्टला वरवीं फकत ऑनलायन पद्दतीन हे अर्ज मागयल्यात.
पुरस्काराच्या मार्गदर्शक तत्वां प्रमाण पात्र अर्जदारांनी फकत www.dbtyas-sports.gov.in ह्या पोर्टला वरवीं ऑनलायन अर्ज करचो. ऑनलायन अर्ज भरपाक कसलोय त्रास जाल्यार अर्जदारांनी खेळां खात्या कडेन sportsawards-moyas[at]gov[dot]in आनी 011-233-87432 ह्या नंबराचेर खंयच्याय कामाच्या दिसा सकाळीं 9 ते सांजेवेळार 5.30 मेरेन वा टोल फ्री नंबर 1800-202-5155, 1800-258-5155 ह्या नंबराचेर संपर्क करूं येता. (खंयच्याय कामाच्या दिसा सकाळीं 8 ते रातीं 8 मेरेन). पुरस्कारां खातीर पात्र खेळगड्यां/ प्रशिक्षक/ संस्थांचे अर्ज 28 ऑक्टोबर रातच्या 11.59 वरां मेरेन www.dbtyas-sports.gov.in ह्या ऑनलायन पोर्टलाचेर सादर करचे.