भांगरभूंय | प्रतिनिधी
जोयडा : व्हिसाची मुदत सोंपले उपरांतूय कारवार जिल्ह्यांल्या गोकर्णच्या दोंगरांत एके गुहेंत आपल्या दोन भुरग्यां सयत रावपी रशियन बायल नीना कुटीना (40) हिका गोकर्ण पुलिसांनी निमाणी रशियेक परत धाडली. तिचीं भुरगीं प्रेया (6) आनी अमा (4) हांकांय तिचे वांगडा धाडलीं.
नीना कांय म्हयन्यां पयलीं पर्यटन व्हिसार भारतांत आयिल्ली. व्हिसाची मुदत सोंपले उपरांतूय ती आपल्या दोन चलयां सयत गोकर्ण वाठारांतल्या दाट रानांत, दोंगरार आशिल्ले गुहेंत रावताली. घोव डोर्श्लोमो गोल्डस्टायन, जो रशियेंतच रावता, हाचे वांगडा कांय वैयक्तीक मतभेदांक लागून ती भारतांत भुरग्यां सयत राविल्ली. मात घोवान बंगळुरू उच्च न्यायालयांत अर्ज दाखल करून बायल आनी भुरग्यांक परत मांयदेशांत धाडपाची मागणी केल्ली.
मजगतीं, गोकर्ण पुलिसांनी नीना आनी तिच्या भुरग्यांची डीएनए तपासणी करून भुरगीं तिचीच आशिल्ल्याचें स्पश्ट केलें. कांय दिसां आदीं रामतीर्थ अरण्यात गस्त घालतना पुलिसांक नीना आनी भुरगीं गुहेंत लिपून बशिल्लीं सांपडिल्लीं. उपरांत तांकां सुरक्षीत सुवातेर हाडून प्रक्रिया पुराय केली.
अर्जाचेर सुनावणी घेवन न्यायमुर्ती बी. एम. श्याम प्रसाद हांच्या खंडपीठान चवकशी केली. उपरांत बायलां आनी भुरग्यांक रशियेंत परत धाडपाचे आदेश दिले.
न्यायालयाच्या आदेशा प्रमाण सगली शासकीय औपचारिकता पुराय करून निमाणें नीना कुटीना आनी तिच्या भुरग्यांक परत रशियेक धाडलीं. आयज तीं तिगांय रशियेक पाविल्ल्याची म्हायती पुलिसांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
