भांगरभूंय | प्रतिनिधी
सातवो वेतन आयोग लायात, दिसवड्याच्या कामगारांक कायम करात
पणजी : कदंब ट्रान्सपोर्ट कॉर्पोरेशनाच्या (केटीसीएल) वेवस्थापनान कर्मचार्यांच्या प्रलंबीत मागण्यां कडेन आडनदर केल्ल्याचो आरोप कर्मचार्यां कडल्यान केला. हाका लागून केटीसीएल चालक आनी कर्मचार्यांनी पर्वरेच्या मुखेल कार्यालया मुखार एका दिसाचें उपोशण केलें. वेवस्थापनाच्या अपेसाक लागून कर्मचार्यांनी हें आंदोलनाचें पावल उखल्लां.
कर्मचार्यांनी केलेल्या मुखेल मागण्यां मदीं सातव्या वेतन आयोगाची थकबाकी दिवची, 34 म्हयन्यांचें थकीत वेतन रोखडेंच भरचें, पांच वर्सां सेवा पूर्ण केल्ल्या दिसवड्या वयल्या ड्रायव्हर, कंटक्टरांची सेवा नियमीत करची. तांकां थळाव्या कर्मचार्यां प्रमाण सगलें वेतन आनी लाव मेळचे, अशें तांणी स्पश्ट केलें.
बडटी सयत ईपीएफओचो मुद्दो
सगले कर्मचारी, मॅकानीक, कंडक्टर, ड्रायव्हर आनी क्लार्क हांकां ज्येश्ठते प्रमाण बडट्यो दिवच्यो. कसलेच तरेचो भेदभाव करचो न्हय. 12 कर्मचार्यांच्यो वेतन त्रुटी दुरुस्त करून तांकां दोन वेतनवाढीचो लाव दिवचो, ही मागणी जुलय 2019 सावन प्रलबीत आसा. 2009 सावन मार्च 2025 मेरेनचे सगले ईपीएफओ योगदान बेगोबेग भरचे, अशी मागणी तांणी केली. हातूंत निवृत्त कर्मचार्यांचोय आसपाव आसा.
कंत्राटी ईव्ही ड्रायव्हरांच्यो समस्या
कंत्राटदारां वरवीं कार्यरत आशिल्ल्या इलेक्ट्रिक व्हेईकल (ईव्ही) ड्रायव्हरांच्यो समस्याय कर्मचार्यांनी मांडल्यो. कंत्राटी ईव्ही ड्रायव्हरांच्यो मागण्यो बेगोबेग पुराय जावच्यो. तांच्या विश्रांती कक्षाची समस्या झुजा पांवड्यार सोडोवन तांकां रजा आनी बोनस अश्यो मानवी सेवाशर्ती लागू करच्यो. कंत्राटदारां वरवीं चलोवपी सगल्या ईव्ही बसीं खातीर केटीसीएलच्या ड्रायव्हरांचो वापर करचो. तशेंच, सगल्या इलेक्ट्रिक बसींची मालकी, संचालन आनी सांबाळ करपाची जापसालदारकी केटीसीएल कडेन आसची, अशी मागणीय तांणी केली. निमाणें, केटीसीएलांत आसपाव जाल्ल्या सगल्या ड्रायव्हरांक केटीसीएलचो निळो गणभेस बेगोबग दिवचो, अशी मागणी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
