भांगरभूंय | प्रतिनिधी
फोंडें: गोवा डेरीच्या कामगारांनी आपल्या विवीध मागण्यां खातीर सोमारा सकाळीं धरणें आंदोलन केलें. सकाळीं दादा वैद्य चौकांत तांणी आपल्या विवीध मागण्यां खातीर घोशणा दिले उपरांत गोवा डेरीच्या गेटी मुखार दनपार मेरेन निदर्शनां केलीं. गोवा मिल्क युनियन एम्पलॉईस असोसिएशन आनी गोमंतक मजूर संघ हांच्या जोड पालवान हीं निदर्शनां केलीं. कामगार फुडारी क्रिस्तोफर फोन्सेका आनी पुती गांवकार हांणी ह्या वेळार तांकां मार्गदर्शन केलें.
कामगारांनी दिल्ले म्हायती प्रमाण ऑक्टोबर 2024 त कामगारांनी संप करपा संबंदी नोटीस दिल्ली. कामगारांच्यो खूबश्यो मागण्यो फाटल्या कितल्याशाच वर्सां सावन गोवा डेरीच्या वेवस्थापनान प्रलंबीत दवरिल्ल्याच्या निशेधार्थ हो संप करपाचे आशिल्ले. पूण त्या वेळार सहकार मंत्री सुभाष शिरोडकार हांणी मध्यस्ती करून कांय मागण्यो मान्य करपा विशीं आस्वासन दिल्लें.
अंदूंचे चवथी पयलीं लेगीत मंत्री सुभाष शिरोडकार हांचे बराबर कामगार युनियनाचनी बसका जाल्ली. पूण थंय लेगीत कामगारांचें समाधान जालें ना.
पगारांतल्या डीएत वाड करप, 2023 सावन डीएची तफावत दिवप, कंत्राटी आनी दीसवड्या वेल्या कामगारांक नोकरेंत कायम करप, पगाराच्या स्केलांत वाड करप, सातव्या वेतन आयोगाचे फायदे डेरी कामगारांक दिवप, गोवा डेरींत जो गोंदळाचो कारभार सुरू आसा तो जाग्यार घालप, गोवा डेरीच्या उत्पादनाचो खप वाडोवप बी मागण्यांचें निवेदन तेन्ना लेगीत डेरीच्या वेवस्थापनाक दिल्लें.
सोमारा परतून एकदां हें निवेदन गोवा डेरीच्या वेवस्थापन समितीक दिल्ल्याचें कामगारांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
