भांगरभूंय | प्रतिनिधी
मडगांव : दसर्याचे फाटभूंयेर दक्षीण गोंयांत देवळांतल्या गर्दीचें वेवस्थापन, येरादारी कोयंडी, गरजेच्यो सेवा हे विशीं नियोजन करप, दक्षीण गोंय जिल्लोधिकार्या कडल्यान पुली, भलायकी, उजो पालोवपी दळ, बांदकाम खातें, देवळाच्या वेवस्थापनांक आदेश जारी केल्यात.
दक्षीण गोंय जिल्लोधिकारी एग्ना क्लिटस हांणी हे विशीं आदेश जारी केल्या. 1 आनी 2 ऑक्टोबराक जावपी दसरो उत्सवा मजगतीं भौशीक सुरक्षा, कायदो आनी सुवेवस्था, आपत्कालीन सज्जताय सुनिश्चीत करपाक हे निर्देश जारी केल्यात. जिल्ह्यांतले सगले संबंदीत अधिकारी आनी देवळांच्या समित्यांनी समन्वीत कारवाय करपाचे आदेश दिल्यात.
ह्यान पयलींच्या घडणुकां मदीं गर्दी वेवस्थापन, येरादारी नियंत्रण आनी आपत्कालीन प्रतिसादात कांय आडमेळीं आयिल्लीं. ताचेर वेळार नियोजन करून आनी सगल्यांच्या समन्वयाक लागून ह्यो घडणुको टाळपाक शकतात. हाका लागून उत्सवा मजगतीं मुखेल देवळांनी अपेक्षीत आशिल्ली गर्दी लक्षांत घेवन नियोजनाचे निर्देश दिल्यात.
उपजिल्लोधिकारी आनी उपविभागीय दंडाधिकारी हांणी उत्सव सुरळीत जावचे खातीर देवळांच्यो समित्यो आनी संबंदीत विभागां सोबत वांगडा बसका आपयल्यात. मामलेदार आनी सहाय्यक मामलेदारां सयत सगले कार्यकारी दंडाधिकारी हांणी भौशीक सुवेवस्था राखपाक अधिकारांचो वापर करून पुराय उत्सवा मजगतीं नियुक्त केल्ले सुवातेर प्रत्यक्षांत हाजीर रावप गरजेचें.
दक्षीण गोंय पुलीस अधीक्षकांनी उत्सवांचे सुवातेर वर्दीतले गरजेचे कर्मचारी तैनात आसतले, हाची खात्री करची. उपविभागीय अधिकारी आनी पुलीस निरीक्षक गर्दीचे नेम आनी संवेदनशील भागांचेर 24 वरां नदर दवरतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
