भांगरभूंय | प्रतिनिधी
पणजी : येरादारी खात्याच्या नव्या नेमां प्रमाण प्रतिज्ञापत्राचेर वाहन नोंदणी करप आतां शक्य जातलें. मात अशें जालें जाल्यार बिगर गोंयकार हांगा येवन नोंदणी करतले. थळावे वेवसायीक तशेंच सुविधांचेर ताचो परिणाम जावपाक शकता. अशा वाहन नोंदणेक लागून सरकाराची येणावळ बुडपाची शक्यताय आसा. तेन्ना येरादारी खात्यान हो नेम तशेंच लिव्ह अँड लायसन्स आनी डिलरा वरवीं करपी नोंदणीय बंद करची अशी मागणी सुदीप ताम्हणकार हांणी केली.
सोमारा तांणी येरादारी खात्यांतल्या अधिकार्यांक भेट दिवन हे विशीं निवेदन दिलें. ताम्हणकार हांणी सांगलें, येरादारी खात्यान 23 सप्टेंबराक एक आदेश काडला. ते प्रमाण वाहनधारकाचे प्रतिज्ञापत्र आनी ना हरकत दाखलो घेवन नोंदणी करपाक मेळटली. आवडीचो नंबर घेवपाक नवी सिरीज उगडची पडल्यार आनीक शुल्क घेतले. नव्या आदेशाचो आधार घेवन कोणूय सोयर्यांचे एनओसीचेर उण्या शुल्कांत नंबर घेवपाक शकता.
तशेंच ऑल इंडिया परमिट आसपी बसीय गोंयांत सहज नोंदणी करपाक शकतात. हाका लागून सरकार म्हयन्याक एके बसी फाटल्यान 10 ते 12 हजार रुपया लुकसाण जावपाक शकता. फाटल्या कांय म्हयन्यांत भायले बसीची गोंयांत नोंदणीय जाल्या. हाका लागून राज्यांत वाहनांची नोंदणी वाडटली. येरादारी कोंडी, अपघातांतूय वाड जावपाची शक्यताय आसा. सध्या गोंयांत महामार्गूय वाहनां खातीर उणे पडटात. अश्या वेळार नोंदणी नेमांनी बदल केल्यार साधन सुविधांचेर ताण येवपाची शक्यताय आसा. म्हूण हो आदेश फाटीं घेवप गरजेचें, अशें ताम्हणकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
