भांगरभूंय | प्रतिनिधी
अमृतसर, खबरां संस्था: मुंबयच्या वांद्रे टर्मिनस सावन अमृतसराक वचपी पश्चीम एक्सप्रेसचे (ट्रेन नंबर 12925) दोन एसी डबे कांय मिनटांनीच दोन फावटीं वेगळे जाले. ट्रेन चालू आसतना ह्यो घडणुको घडल्यो. पयली घडणूक महाराष्ट्रांत आनी दुसरी घडणूक गुजरातांत घडली. हाका लागून प्रवाशांचे सुरक्षिततायेचेर प्रस्न निर्माण जाले.
तशेंच, रेल्वेन बेगोबेग कारवाय केली आनी ट्रेन पसून सेगीत वेगळे जावपी डबे बदल्ले. कपलिंगांत तांत्रीक इबाड जाल्ल्यान ह्यो घडणुको घडिल्ल्याचें समजता. ह्या डब्यांतल्या सगल्या प्रवाशांक सुरक्षीतपणान भायर काडले. सध्या, ही ट्रेन तीन वरां उसरां धांवता.
हे विशीं चड म्हायती प्रमाण, पश्चीम एक्सप्रेस आयतारा सकाळीं 11:35 वरांचेर मुंबयच्या वांद्रे टर्मिनसा वेल्यान सुटली. दनपरां सुमार 1:15 वरांचेर ही ट्रेन महाराष्ट्रांतल्या वाणगाव आनी डहाणू रोड स्टेशना मजगतीं धांवतना एसी डबे A1 आनी A2 च्या जोडणींत तांत्रीक इबाड जालो. हाका लागून दोनूय डबे वेगळे जाले.
गुजरातांतूय हेच समस्येक लागून ही ट्रेन उरली: उपरांत, ट्रेन सुमार 25 मिनटां थंयच उरली. ट्रेन पायलट आनी हेर कर्मचार्यांनी तांच्या पांवड्यार तांत्रीक दुरुस्ती केली आनी उपरांत ट्रेन दनपरां 1:45 वरांचेर भायर सरली. ट्रेनीन मात्शें अंतर हुपिल्लें इतल्यान परत ट्रेनीचे तेच डबे सुटले. ही घडणूक 2:10 वरांचेर गुजरातांतल्या संजन स्टेशना लागसार घडली.
सगले प्रवाशी सुरक्षीत
रेल्वेच्या म्हणण्या प्रमाण, हे घडणुकेंत खंयचोच प्रवासी जखमी जावंक ना. प्रवाश्यांच्या वेळांत मात्सो बदल जाला. तशेंच ट्रेनीचो वेग आनी दुरुस्तीच्या कामाक लागून कळाव जालो. सध्या, ट्रेन चार वरां उसरां धांवता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
