भांगरभूंय | प्रतिनिधी
नवी दिल्ली, खबरां संस्था: भारतांत लोकां मदीं भांगरा खातीर एक वेगळेच तरेची ओड पळोवपाक मेळटा. भारतांत भांगराचें वा रुप्याच्यो वस्ती घालिनात जाल्यार तें लग्न अपुराय मानतात. लोक वेगवेगळ्या प्रसंगाचेर एकामेकांक भांगराच्यो वस्ती वा बारीक सारीक कितेंय भेट म्हूण दितात. भांगर भारतांत शुभ मानतात. इतलेंच न्हय तर सुरक्षीत गुंतवणूक म्हणून ताची चड मागणी आसा. भांगराच्या ह्या पिशेंपणाक लागून भारतीय कुटुंबांकडेन अदमासान 25 हजार टन भांगर आसा आनी हो आंकडो दिसान दीस वाडतूच आसा. हाचो परिणाम, भारतीय कुटुंबांकडेन संवसारांतलें सगल्यांत चड भांगर आसा.
भारतीयांच्या भांगरावेल्या मोगाचो संदर्भ दीत एका संशोधन विश्लेशकान मार्च म्हयन्यांत एक धक्को दिवपी आंकडेवारी उक्तडार हाडली. ते प्रमाण, भारतांत भांगराचे संपत्तींत फकत एका वर्सांत सुमार 750 अब्ज डॉलर्सची वाड जाली. हाचेवेल्यान फाटल्या वर्सा देशभरांत कितलें भांगर विकतें घेतलें हें दिसून येता. विश्लेशक ए.के. माधवन हांणी एक्सचेर एका पोस्टांत म्हणलां, भारताचो खाजगी भांगराचो सांठो 25,000 टन आसा, जो अमेरिका, जर्मनी, चीन आनी सामको रिझर्व्ह बँकेकडेन आशिल्ल्या भांगराच्या सांठ्या परस चड आसा.
चिना उपरांत भारत भांगराचो संवसारांतलो दुसरो सगल्यांत व्हड गिरायक. अमेरिका, जर्मनी, इटली, फ्रान्स, रशिया, चीन, स्वित्झर्लंड, भारत, जपान आनी तुर्की अश्या देशांच्या मध्यवर्ती बँकांकडेन आशिल्ल्या वट्ट भांगराच्या सांठ्याची तुळा भारतीय कुटुंबांकडेन आशिल्ल्या भांगरा कडेनूच जायना. हाचे वेल्यान भारतांतले लोक बचत वा गुंतवणुकीच्या दृश्टीकोनांतल्यान भांगराक कितलें म्हत्वाचें मानतात हें दिसून येता.
भारतांत भांगर हें सदांच सगल्यांचें आवडटें आशिल्लें. कारण तें म्हारगाय, अर्थीक अनिश्चितताय आनी चलनांतल्या चड-देंवपा पसून संरक्षण म्हणून काम करता. लग्न आनी परबांच्या काळांत ताची मागणी आनीक वाडटा. गांवांत रावपी आनी तांच्यो अर्थीक गरजो पुराय करपा खातीर जायते फावटीं भांगराचो वापर तारण म्हणून करतात. भांगराचे किमतींत संवसारीक चडटी-देंवती आसूनय, चिना उपरांत भारत भांगराचो संवसारांतलें दुसरें गिरायक जावन आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
