भांगरभूंय | प्रतिनिधी
सरस्वती ही विद्येची देवता. शिक्षणाच्या मळार पावल घालपी मनीस प्रत्यक्ष वा अप्रत्यक्षपणान तिचीच साधना करता. आपले जिणेंत ज्ञानशारदेचें व्रत करपी शिक्षक विलास सतरकार हांचे विशी….
अक्षरांतले अ आनी ज्ञानांतले ज्ञ हांगा मेरेन अध्ययन ते अध्यापन हो प्रवास करून विद्येच्या कुळागरांत ल्हान- व्हड विद्यार्थी रूपांतली रोपां स्वताच्या शिकोवपाच्या शिंपणावळींतल्यान जाणी वाडयली अशें आदरणीय मुख्याध्यापक विलास सतरकार सर.
विलास ह्या उतराचो अर्थ आनंद असोय आसा. तांच्या शिक्षणाच्या वावराक ह्याच आनंदाची जोड मेळ्ळ्या. आयज आमचोय आनंद तांतूत आस्पावन सगळी कडेन आनंदी आनंद जाला. हाचे कारण म्हणल्यार आमच्या विलासभाईक राष्ट्रीय शिक्षक पुरस्कार हो शिक्षण मळावयलो मानाचो पुरस्कार फावो जाला. विद्यार्थ्यांच्या फाटीर शाबासकीची थाप मारपी एका शिक्षकाक ताच्या अनन्यसाधारण वावरा खातीर राष्ट्र पांवड्यार गाविल्लो हो पुरस्कार आयज आमकां सगळ्यांक प्रेरणा दिवपी थारता.
मातयेच्या एका कणा पासून स्वताच्या कश्टान आनी प्रामाणिक यत्नान विलास सर एकोणतीस वर्सा शिक्षक म्हूण आनी तातूंतल्या तातूंत मुख्याध्यापक म्हूण डॉ. के. ब. हेडगेवार माध्यमिक विद्यालयात कार्य करतात. निसुवार्थीपणान वावर करीत शिक्षण मळार तरेकवार प्रयोग करून तांणी विद्यार्थ्यांच्या सर्वागीण विकासा वांगडाच तांका सर्तींतल्या जगा खातीर तयार करपाचेय व्हड मोलादीक कार्य सर आनी तांची शिक्षण संस्था करीत आसा. सरांचे शिक्षण मळावयले कार्य देख देणेच थारता कारण तांणी ल्हान कुडींत सुरू केल्ली वर्गकुड विकसीत जावन तिचे रूपांतर आयज नामनेच्या शिक्षण संस्थेत जाला. ती संस्था आयज शिक्षणाच्या मळार सरांच्या सांगातान आनी मार्गदर्शनाखाला येसस्वी जायत आसा. 100 टक्के निकाल तर हाडटाच ताच्याच वांगडा हेंर मळांचेर जैतां मेळयत व्हड जायत आसात.
शिक्षक हो फकत पेशा न्हय, तें काम न्हय तर तीं एक जापसालदारकी. एक कुमार मडक्यो करताना, मातयेक आकाराक हाडटाना आनी उपरांत जगा मुखार त्यो मांडटाना आपली कलाकुसर पणाक लायता. मात्सो हांत वाकडो लागत वा मात्शी चुक जायत जाल्यार तें मातयेचे आयदन फुकट वयता. ताका फावो ते मोल मेळना. देखून आपलो पुराय जीव तातूंत ओतून एक कुमार ते मातयेचे आयदन तयार करता. अशेच शिक्षणाच्या मळार साधना करपी एका शिक्षकाचे बाबतीत आसता. शिक्षक शिकयता- शिकयता विद्यार्थी लेगीत घडयता. म्हूणनूच साबार मळार वावर करप्यांक लेगीत शिक्षकूच तयार करता. विलास सर हें अशेच एक कर्तबगार, मोगाळ तशेच नमळायेन परिपक्व अशें एक शिक्षक. हेंच तांचे खरे खाशेलपण. कारण ज्ञान हें उकलपाक जड. आनी ज्ञानाचे मुकुट धारण करून विद्यादानाची सेवा करताना शारदेची नमळायेन सेवा करप हें विलास सरां सारक्या शिक्षकाकूच शक्य जाता. ज्ञान वाडटा तेन्ना अहंकाराचोय मात्सो वारो कानान भरता. पूण ज्ञानाचो मुंडासो माथ्याक बांदून हांसोन खेळोवन आनी ल्हान व्हड सगळ्यांच्याच वांगडा खालतेंपणान कशें वागप हें तांच्या वागपांतल्यान शिकपा सारके आसा.
एक म्हण्णी आसा, ‘विद्या विनयेन शोभते’. हीं म्हण्णी विलासभाई तुमच्या जिवीतांतलो सत्कर्मी वावर खरी करून दाखयता. सगळ्यां भितर साखरे भशेन तुमीं घोळटा. सगळ्यां कडेन आपुलकायेन वागता. आमकां सगळ्यांक, घरच्यांक तुमी आयज प्रेरणारूख थारयल्यात. सरांचे जिवीत आनी आयुश्य अखंडतायेन सदांच आमकां अशीच प्रेरणा दिवपी थारूं. तांची शारदेची उपासना अशीच सासणाची चालूच उरूं. तांच्या सांगातान शिक्षणमळ पाचवेचार चवरूं. देवी सरस्वतीन तांकां सुखां समाधानान दवरूं.
विलाससर आमकां तुमचो सार्थ अभिमान… तुमच्या अध्यापन साधनेक आमचे नमळायेचे पयलें नमन!
चेतन वामन खेडेकार
99236 44678
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
