भांगरभूंय | प्रतिनिधी
पर्वरे ‘गुजा’ची बिहायंड द बायलायन’ कार्यावळ
म्हापशें: पत्रकार हो समाजाचो मार्गदर्शक आसा. सत्याची पालखी खांदार घेवन समाजाचो मार्गदर्शक जावपाची आपली जबाबदारी पत्रकारांनी सदांच दवरची. ड्रग्स सारक्या वेसनाच्या विळख्यांतल्यान तरणाटे पिळगेक मुक्त करपी पत्रकारिता नव्या पत्रकारांनी करची अशें आवाहन ज्येश्ठ पत्रकार उदय म्हाड्डोळकार हांणी केलें.
गोंय श्रमीक पत्रकार संघटणे वतीन (गूज) आयोजीत ‘बिहायंड द बायलायन’ ह्या म्हयन्याळे कार्यावळींत ते उलयताले. म्हाड्डोळकार दुयेंत आशिल्ल्यान तांच्या घरा ही कार्यावळ आयोजीत केल्ली.
टेलिफोन ऑपरेटर ते मुख्य उपसंपादक अशी नामना आशिल्ले उदय म्हाड्डोळकार हांचे कडेन ज्येश्ठ पत्रकार विठ्ठल गावडे पारवाडकार हांणी संवाद सादलो.
आपूण आपल्या 37 वर्सांच्या पत्रकारिता कारकिर्दीचेर समाधानी आसा. टेलिफोन ऑपरेटर म्हूण दिसाळ्यांत रुजू जावन ज्येश्ठ उपसंपादक म्हूण निवृत्त जालो. काम करतना आपणें म्हाविद्यालयीन शिक्षण घेतलें. अशें सांगून पत्रकारितेतले बरे वायट अणभव म्हाड्डोळकार हांणी ह्या वेळार सांगलें.
कामा कडेन प्रामाणीक रावल्यार जिणेचे उदरगतीचो मार्ग उक्तो जाता. पयलींच्या काळांत दिसाळ्यांनी जायराती उण्यो आसताल्यो. सद्याच्या काळांत जायराती वाडिल्ल्यो आसल्यो तरी प्रिंट पत्रकारिता ही आयजूय लोकांच्या विस्वासाचें साधन आसा. फेसबूक लायव्ह, ई-पेपर हांचे गर्देंतूय प्रिंट दिसाळ्याची भुमिका आनी म्हत्व अढळ आसा अशें म्हड्डोळकार हांणी म्हणलें.
सुरवेक गूजाचे अध्यक्ष राजतिलक नायक हांणी येवकार दलो. कार्यकारिणी वांगडी उमेश झर्मेंकार हांणी म्हाड्डोळकार आनी पारवाडकार हांची वळख करून दिली. कार्यकारिणी वांगडी गौरी मळकर्णेकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
