भांगरभूंय | प्रतिनिधी
पणजी : ग्रामस्थांच्या खर विरोधाक लागून सरकारान कोडारचो नियोजीत आयआयटी प्रकल्प रद्द केला. थळावे आमदार आनी उदका पुरवण मंत्री सुभाष शिरोडकार हांणी पत्रकार परिशदेंत आयज ही म्हायती दिली. ह्या वेळार कोडार कोमुनीदादीचे अध्यक्ष प्रशांत गांवकार, सरपंच मधू खांडेपारकार आनी शिरोडें भाजप अध्यक्ष अक्षय गांवकार हाजीर आशिल्ले.
मजगतीं, ह्या निर्णयाक विरोधी पक्षांचे फुडारी विजय सरदेसाय, युरी आलेमांव, अमित पालेकार आनी हेरांनी येवकार दिला. लोकांचें हें जैत अशें तांणी म्हणलां.
कोडार गांवांत कोमुनिदादीची 19 लाख चौखण मिटर जमीन आसा. हे जमिनींत इल्ली पसून पिकावळ ना. हाका लागून आयआयटी खातीर हे जागेचो विचार आशिल्लो. काय दिसां पयली मुख्यमंत्री डॉ. प्रमोद सावंत हांचे कडेन बसका जाली. लोकांक नाका जाल्यार आयआयटी कोडार हांगा जावची ना, अशें उतर मुख्यमंत्री डॉ. प्रमोद सावंत हांणी दिलें. हाका लागून कोडार आयआयटीचो प्रस्ताव आतां रद्द जाला.
तशी आयआयटी फर्मागुडयेर चालू आसा. ती चालू उरपाक जाय. आयआयटी कोडार गांवांत जाल्ली जाल्यार हो गांव देशाच्या नकाशाचेर पावतलो आसलो, अशें मंत्री शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
