भांगरभूंय | प्रतिनिधी
बेळगांव जिल्लो पोक्सो न्यायालयाचो इतिहासीक निकाल
बेळगांव : एका इतिहासीक निकालांत, बेळगांव जिल्लो पोक्सो न्यायालयान रायबाग म्हालांतल्या परमानंदवाडीच्या 28 वर्सां पिरायेच्या भरतेश रावसाब मिरजी हाका 2019 वर्सा 8 वर्सां पिरायेचे चलयेचेर बलात्कार आनी उपरांत खून केल्ल्या प्रकरणांत मरणाची ख्यास्त आयकयली.
नेमकें प्रकरण कितें?
ही घडणूक 15 ऑक्टोबर 2019 दिसा घडिल्ली. जेन्ना तें ल्हान चली लागींच्या दुकानांत गेल्लें तेन्ना आरोपीन ताका आपल्या घरांत व्हेलें. ताचेर लैंगीक अत्त्याचार केले. उपरांत ताच्या आंगाक फातर बांदलो आनी फातरा सयत ताका बांयंत उडयलें. सुण्यांच्या पंगडाचे मजतीन केल्ले सोद मोहिमे वरवीं ते चलयेची कूड पुलिसांक सांपडली.
तपासणे वेळार वकिलांनी 20 साक्षीदार, 106 कागदपत्रां आनी 22 पुरावे सादर केले. हाका लागून आरोपीच्या गुन्यांवां विशीं कसलेच तरेचो दुबाव उरूंक ना. निकाल दितना न्यायाधीश सी. एम. पुष्पलथा हांणी मिरजीक मरणाची ख्यास्त दिली. तशेंच कायद्याच्या संबंदीत कलमां खाला आनीक ख्यास्त आनी दंड दिलो. न्यायालयान आरोपीक पिडेस्ताच्या पालकांक 10 लाख रुपया भरपाय दिवपाचे निर्देशूय दिले. राज्य सरकाराचे वतीन विशेश सरकारी वकील एल. व्ही. पाटील हजर आशिल्ले
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
