भांगरभूंय | प्रतिनिधी
27 नुस्तेंमार्यांक वाटावपाक येस
मडगांव : मोबोर दर्यांत रातीं सुमार एक वरांचेर एक नुस्तेंमारी दर्यांत बंद पडून बुडिल्ल्याची घडणूक घडली. दयार खवदळिल्लो आसतना आनी नेटान पास झडटनाय नुस्तेंमार पेले फर्नांडीस हांचे सयत जीवरक्षक, कोस्टल पुलीस हांच्या सहकार्यान जेट स्की वरवीं दर्यांत आडकून उरिल्ल्या २७ नुस्तेंमार्यांक वाटावपाक येस आयलें.
हे विशीं म्हायती दितना नुस्तेंमार पेले फर्नांडीस हांणी सांगलें, शेनवारा रातीं सुमार एक वरांचेर बेतूलच्या एका नुस्तेंमार्याचो फोन आयलो. तांणी आपली बोट दर्यांत बुडटा. तातूंत नुस्तेंमार आशिल्ल्यान सहकार्य करपाची मागणी केली. रातचो वेळ आनी पावसूय नेटान झडटालो. हाका लागून दर्यांत वयचें काय ना ह्या विचारांत आसतना बायलेनूय नुस्तेंमार्यांच्या जिवाचो प्रस्न आशिल्ल्यान तांकां वाटावपाक वचपाक फाटबळ दिलें. मागीर मोबोर दर्यादेग वाठारांत रातचें गेले उपरांत दयारंत व्हड ल्हारां येवपाक लागलीं. उपरांत सामान एकठांय करपाक आनी जेट स्की खंय लावपाची हाची सुवात थारावन वाटावपाची मोहीम राबयली. तो मेरेन सकाळ जाल्ली. मात्सो उजवाड दिसपाक लागलो.उपरांत जेटस्कीचे मजतीन नुस्तेंमार्यांक बुडपी बोटींतल्यान दर्यादेगेर हाडले. ह्या वाटावपाच्या कार्यांत जीवरक्षक सतीश गांवकार, समीर गांवकार आनी लवू गांवकार हांच्या कोस्टल पुलिसांचें सहकार्य मेळ्ळें.
अंदूं कॅप्टन ऑफ पोर्ट, नुस्तें खातें, पर्यटन विभाग हांणी वॉटर स्पोर्टसचो परवानो रोखडोच दिलो. हाका लागून जेट स्कीचीं कामां रोखडींच जाल्लीं. हाका लागून तिचो वापर करपाक मेळ्ळो. कोस्टल पुलिसां कडेन गरजेची बोट उपलब्ध नाशिल्ल्याचें दिसून आयलें. कोस्टल पुलिसांक सरकारान गरजेचें सामान उपलब्ध करून दितना राज्यांत चार बोटी घेवच्यो. तशेंच नुस्तेंमारी खातीर वचपी बोटींतल्यान फायदो जायत आसता मात त्या बोटींवेल्या नुस्तेंमार्यांचो जीव वाटावपा गरजेचें सामान उपलब्ध नासता. राज्य सरकारान दर्यादेगांवेले सुरक्षितताये कडेन लक्ष दिवचें, अशी मागणी पेले हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
