भांगरभूंय | प्रतिनिधी
ज्येश्ठनीत- 22
कॅमेरा भौशीक सुवातींनी लायिल्ले आसात हें जेन्ना सरकार सांगता तेन्ना भौसांकय ते चलता भोंवतना वाट दाखोवपी आसचे…
नाका, नाका म्हण्टना अचकीत बँकेच्या खात्यांत आयिल्लो पयसो खर्च जाता. हातांत आयिल्ले पयशे खर्चय करतना दसरो, दिवाळेक सान वस्त विकती घेतना जतनाय घेयात. वजन करुन, पयशांचीं गणितां करुन, फुडाराचें चिंतून, तारीख पळोवन. दिवप घेवप करतनाय सांबाळून करचें. तीच तर ज्येश्ठनित.
तुमकां आमकां आई, बाबा, आजो, आज्यान शिकयल्ली संस्कृताय आपणायल्यार तुमचो फुडार खोस दिवपी, खोस घेवन येवपी आसतलो. उतरांचेंय तशेंच तांचो उपेग करतना चिंतचें, कालच्या ज्येश्ठांवरी. चड नासत तरी फाटल्या धा वर्सांचो तेंप उसयतना चुकोय दिसतल्यो. त्यो सुदारप शक्य आसा. ल्हानांनी तेंच केल्यार ज्येश्ठ धादोशी जातात.
आत्मे शांत जावपाक धा जाणांक आपोवन श्राद्ध वाडपाचे दीस सोंपले. पूजेक फुलांच्यो राशी, उजवातीचो धुंवर करपा परस एकूच धुपारती दाखयल्यार, भुकेल्यांक अन्न दिल्यार, शिक्षणाची दारां उगतीं केल्यार पुण्याय मेळटली. जागृतायेंत फुडें वतना पयसो, पयसोच म्हणत तत्वां शेणयल्यार निमणे यादी कसल्यो उरतल्यो? फकत पयशांच्यो? दिवप घेवप करतना यादी जागोवया, फाटीं कितें बरोवन दवरील्लें आसल्यार ताचेर नदर मारुया, दिवप घेवपय मोलादिक, सांसणाचें यादींतलें करुया.
दिवपा घेवपा पासत घराघरांनी वचपाक दीस कितले उल्ल्यात? केन्ना केन्ना दिवप घेवप 365 दिसांचें जाल्यार? डुप्लिकेट आसल्यारय रस्त्यार भिरकावन उडवचें न्हय. तशें करतल्यांक सोदून काडपाची तांक ज्येश्ठांमदीं नासत पूण तांच्या अणभवाचो उपेग करुन, तांकां आधार केल्यार पयसुल्ल्या कॅमेऱ्यांतलें तांकां दिसतलें.
कॅमेरा भौशीक सुवातींनी लायिल्ले आसात हें जेन्ना सरकार सांगता तेन्ना भौसांकय ते चलता भोंवतना वाट दाखोवपी आसचे. चुकीचे वाटेन वतल्यांक थांबोवपी, सुदारपी आसतले. दिव्यांगांकय उंचायेर व्हरतले. भोंवल्यारुच न्हय बशिल्लेकडेन तकली वयर करुन उगत्या दोळ्यांनी पळेल्यार कॅमेरा तुमची, आमची चिंतनाय मोनीं करतले.
उलोवंक, आयकूंक नाशिल्ल्यांक, दिसनाशिल्ल्यांक, हात पांय नदर नाशिल्ल्यांक तुमच्या आमच्या पयशांतल्यान शिक्षण मेळ्ळ्यार तीं दोतोर, इंजिनियरच न्हय संशोधकय जातात. फुडारांत चंद्र, सूर्यार तेच युवा देंवल्यार अजाप दिसचेना. तांकां उमेद दियात, फुडारांकडेन पळोवंक, फुडें वचूंक शिकयात. जेश्ठांनी तें केलें, तुमी आमी तीच ज्येश्ठनिती कित्याक आपणावपाची न्हय?
दिवपा, घेवपाच्यो, सुदारपाच्यो खबरी मारतना थळाव्यांची व्हडवीकाय आयकूंक येता. लागीं गेल्यार थळाव्यांची रंगा रुपां इंद्रधोणुवरीं दिसतात, तीं वेंचतना सादूर रावल्यार मोर दारार नाचतले, मोराचीं पांखां नकली दिसतलीं.
मोराची पांखां काडल्यार ख्यास्त जाता असो कायदो जेन्ना सांगता तेन्ना चार दीस मोराचीं पांखां विकपी लिपून बसतले. पानांचो रंग लावन, कागदाचीं पाखां बांदून उत्सवांनी मोर नाचल्यार आडावपी आसतले. मनीस मोर जावन नाचतना ताका आडायल्यार नाचतल्याक उलोवपाची कळाशी आसपाक जाय, कायद्याची भास कळप बरें.
दिवपा घेवपाक मुखेल माचयेची, उत्सवांची, बसकांची गरज कित्याक? ते खातीर आतां नवी माची जाता तेन्ना खंयची बरी, गुणेस्त तें सोदून काडप वरिश्ठांचेर सोडप बरें. अणभवान वरिश्ठांक, पिरायेन ज्येश्ठांक, ल्हानांक एकठांय हाडल्यार कदेलां, मेजांय उरचींना. एकल्याक दिल्यार दुसऱ्याक वायट दिसलें जाल्यारय दिवप कित्याक थांबोवप? घेवप आडावपाक येता. गरजवंतांकच न्हय गुरुंकय दिवपाची, दितना ल्हानात ल्हान जावपाची तीच तर ज्येश्ठनीत. दिवप घेवप करतना सांबाळून घेवपाची, सांबाळपाची.
घरच्यां भितर लग्नां, मुंजी, हेर सुवाळे आसल्यार एकामेकां कडेन उलोवन एक वस्त चार जाणांकडल्यान पावची ना हें ठरोवप शक्य जाता. चार जाणांनी एकच बेस बरी यादींत उरपी वस्त दिल्यार ल्हान आसल्यारुय तिचें मोल वाडटा. तीच तर ज्येश्ठनीत. दिवप घेवप एकामेकांक विचारुन करपाची, एकामेकांच्या उपेगाची.
सरकारान टॅक्साचें वजें कमी केलें म्हणल्यार म्हारगाय देंवली, देंवतली, सामान सवाय जातलें अशें न्हय. टॅक्स चुकोवपीय आसतात, तांकांच शिकयल्यार, लाव चार हजारांक जाता. टॅक्स देंवयलां, काडून उडयलां, माथ्यावयलो भार उणो जाला, सगलें सवाय जातलें अशें समेस्तांक दिसलें तरी तें खिणा भितर जावचेंना. ताचे परिणाम दिसपाक म्हयनो, चार म्हयनेय वतले.
दिवप घेवप एका दिसाचें नासता तें फुडलें स म्हयने चलतलें असो अदमास सरकाराक आसता. दिवाळी, दसरो, तुळशीच्या लग्नामागीर येवपी लग्नाचे म्हुर्तय, वर्सभर ते खातीर इल्लें इल्लें करुन विकतें घेवपय हालीं जाता. पयलींय तेंच जातालें, किडूकमिडूक साठोवन, साचोवन दवरिल्लें बँक सांबाळटा तेन्ना गिरायकांच्या बोल्साक बुराक पडटा. दिवप घेवप उणें जायत बंद कशें जातलें? तीच ज्येश्ठनित
सुहासिनी प्रभुगांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
