भांगरभूंय | प्रतिनिधी
भावंडांनो,
ह्या सप्तकांतलो दरेक दीस आमच्या जिवितांत एक वेगळें म्हत्व घेवन येतलो. इतिहासांतलो म्हत्वाच्यो घडणुको आमकां याद करून दितलो. त्या घडणुकांतल्यान वेगळो संदेश आमकां मेळटलो. त्या संदेशांतल्यान आनी यादींतल्यान आमच्या जिविताक नवो मार्ग मेळोवपाचो यत्न आमी करूया.
लतादिदी
गानसम्राज्ञी, गान कोकिळा म्हूण जी नामनेक पावली, आपल्या म्होंवाळ सुरांनी संवसारभरच्या लोकांचीं काळजां जिखलीं आनी धोलयलीं त्या लतादिदींचो, म्हळ्यार लता मंगेशकार, आयज जल्मदीस. तांच्या संगीताच्या मळावयल्या वावरान आनी सेवेन तांकां चार फिल्मफॅर अॅवॉर्ड, दादासाहेब फाळके पुरस्कार, पद्मभूषण, पद्मविभूषण आनी भारत रत्न पुरस्कार भेटोवन देशान तांचो भोवमान केलो. लतादिदींनी कितलींशींच गितां गायलीं आनी लोकांक सदांच बरें दिवपाचो यत्न केलो. आयज कितल्याशाच माध्यमांचेर तांची गितां वाजतात. लोक तीं आयकतात आनी तांकां तोखेतात. तांणी संगीताच्या मळार दिल्लें योगदान हें खूब गिरेस्त आसा आनी तें सदांच गिरेस्त उरतलें.
लुई पाश्चर
पिडेचें सुणें चाबतकच जावपी ’रॅबीज’ वा ’हायड्रोफोबिया’ पिडेचेर लस सोदून काडपी म्हान फ्रेंच रसायन शास्त्रज्ञ लुई पाश्चर हांचोय आयज उगडासाचो दीस. दूद पिड्ड्यार जावचें न्हय म्हूण परिणामकारक पद्दत तांणी सोदून काडिल्ली. तिका आमी ’पाश्चरीकरण’ पद्दत म्हणटात. जंतू आपसूक निर्माण जायनात तर ते वारें, अन्न, उदकांतल्यान प्रवेश करतात. तांचो नाश लुईन करून दाखयलो. ह्या म्हान शास्त्रज्ञाची याद आमी आयज करूया.
रक्तदान दीस
रगत हें संजीवनी आसा. दुसऱ्यांक जीण दिवपी आसा. देखून रक्तदान हें ह्या संवसारांतलें सर्वश्रेश्ठ दान आसा हो संदेश आमी 1 ऑक्टोबर हो दीस पाळून हेर भावंडांक दिवया. ’रक्तदान करून जोडुया नातें भावपणाचें’ हो संदेश दर एकल्याच्या काळजांत जागोवपाचो आमी यत्न करुया.
गांधी, शास्त्री जयंती आनी नितळसाण
भोंवतणच्या दुशीत वातावरणांतल्यान जावपी पिडा, दुयेंसां टाळपा खातीर चोयदिकां निवळसाण राखपाचो संकल्प आमी २ ऑक्टोबराक महात्मा गांधी आनी लाल बहादूर शास्त्री हांच्या जयंती निमतान करुया. त्या संकल्पां वरवीं आमी, आमचें घर, वांठार आनी गांव नितळ दवरपाचो सोपूत घेवन नितळसाण राखपाक कश्ट घेयत रावुया.
एकचार दीस, रानजीव सप्तक
भावंडांनो, ह्या सप्तकांतले हे दीस पाळटना एकवटीतपणान, आपुलकायेन एकामेकांचीं मनां जोडपाचो आमी यत्न करुया आनी 4 ऑक्टोबराक राष्ट्रीय एकचार दिसाक पाळो दिवया. तशेंच सैमांतल्या मोनजाती सयत रानवटी ल्हान व्हड जिवांची राखण करपाक उलो मारून 1 ते 7 ऑक्टोबर मेरेन रानजीव सप्तक पाळुया. त्या पाळपांतल्यान आमी जिविताचो नवो मार्ग सुगूर करीत फुडलें पावल उखलुया हां.
उल्हासभाई.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
