भांगरभूंय | प्रतिनिधी
वास्कोः गोंयच्या उद्देगांनी थळाव्यांक खास करून तरणाट्यांक रोजगार दिवपा खातीर सरळ थळाव्या पंचायतीं कडेन संपर्क करचो असो उलो मुख्यमंत्री डॉ. प्रमोद सावंत हांणी मारलो. वेर्णा इंडस्ट्रीज असोसिएशन (VIA) हे संस्थेचे 24वे वर्सुकी सादारण बसकेंत ते उलयताले.
उद्देग गोंयकारांक फावो तो रोजगार दिनात अशी पोरणी कागाळ आसा. हो प्रस्न सोडोवपा खातीर मुख्यमंत्र्यान एक नवो उपक्रम सुचयला. तांणी म्हणलें, ‘वेर्णा इंडस्ट्रीज असोसिएशनान फुडाकार घेवचो आनी फुडल्या स म्हयन्यांत उद्देगांक जाय आशिल्ल्या रिक्त पदांची वळेरी तयार करची. प्रायोगिक तत्वाचेर ही वळेरी लागसारच्या उण्यांत उण्या पांच पंचायतींक दिवची आनी तांचे कडेन उपलब्ध आशिल्ल्या रोजगार संदींची म्हायती दिवची. ते उपरांत पंचायती थळाव्या उमेदवारांचे अर्ज आनी बायोडाटा एकठांय करून कंपनींक दिवंक शकतात. तातूंतल्यान कंपनींक मुलाखती घेवन भरती प्रक्रिया करपाक मेळटली.
ह्या उपक्रमांत राजकी हस्तक्षेप जावंचो ना. जाका लागून उद्देग आनी पंचायतीं मदीं थेट संवाद जातलो. आयटीआय पदवीधर, अभियंते, सचीव वा हेर पदां खातीर सुमार 200 रिक्त पदांची वळेरी उद्देगान जाहीर करची आनी थळाव्या लोकांक समान संद दिवची अशें तांणी सांगलें. हाका लागून थळाव्या लोकांक नोकरी मेळटलीच, पूण उद्देग आनी गांवांतल्या लोकां मदीं विस्वास आनी संबंद घट जातले.
उद्देगांनी आनीक एक पावल फुडें वचूंक जाय. फुडल्या पांच वर्सांत खंयच्या कुशळटायेची गरज आसा जशें अभियंते, फार्मासिस्ट वा कंपनी सचीव हाची म्हायती पंचायतींक दिवची. हाका लागून धावी आनी बारावे वर्गांतल्या विद्यार्थ्यांक योग्य अभ्यासक्रम वेंचपाक प्रेरणा मेळटली आनी थळाव्या उद्देगांत तांकां स्थिर करिअर करपाचो मार्ग मेळटलो. हो उपक्रम येसस्वी जाल्यार हेर क्षेत्रां खातीर तो आदर्श जावंक शकता अशें मुख्यमंत्र्यान सांगलें. हे कार्यावळींत उद्देग मंत्री मावीन गुदिन्य आनी हेर मानेस्त हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
