भांगरभूंय | प्रतिनिधी
संसारीक पर्यटन दिस व्हडा उमेदीन
भांगरभूंय । प्रतिनिधी
पणजीः फकत अतिथी देवो भव होच विचार घेवन न्हय तर सेवा देवो भव हो विचार आमकां फुडें व्हरून अभिमानान सेवा दिवपाक जाय. पर्यटन सेवेत आनी सरकारी धोरणांत अमुलाग्र बदल करपा खातीर सेवा देवो भव हो विचार पर्यटन मळार खूब गरेजेचो आसा, असो उलो पर्यटन मंत्री रोहन खंवटे हांणी मारलो.
गोंय पर्यटन, टीटीएजी, स्कॉल गोवा हांणी बांबोळे घडोवन हाडिल्लो आंतरराष्ट्रीय पर्यटन दिस व्हडा उमेदीन मनयलो. पर्यटन आनी शाश्वत बदल हे अंदूंच्या दिसाची थिम आशिल्ली. ह्या दिसाचे कार्यावळीत पर्यटक भागधारकांक संबोधित करतना पर्यटन मंत्री रोहन खंवटे उलयताले. तशेंच पर्यटन खात्याचे संचालक केदार नायक, गोंय पर्यटन उदरगत महामंडळाचे वेवस्थापकी संचालक कुलदीप आरोलकार, जिसीसीएची अध्यक्ष प्रतिमा धोंड, टीटीएजीचे अध्यक्ष जॅक सुखिजा आनी हेर मानेस्त हाजीर आशिल्ले.
ह्या वेळार गोंयात येवपी पर्यटकांक बरो अणभव दिवपी बाणावलेचे नुस्तेकार पेले फर्नांडीस हांचो भोवमान केलो. समाजीक माध्यमाचेर गोंयचे पर्यटनाक प्रोत्साहन दिवपी इन्फ्ल्युएर्स्नांचो भोवमान जालो. तशेंच आयएचएम गोंय हे हॉटेल मॅनेजमेंटातल्या विद्यालयाच्या दोन गुणवंत विद्यार्थ्यांक व्हिंसट रामोस ही शिश्यवृत्ती भेटयली.
आमी अतिथी देवो भव उलयत आयल्यात आनी आयज हांव सेवा देवो भव बाबतीत उलयता. जेन्ना आमी पर्यटक हो देव म्हणटा तेन्ना सेवा देवो भव म्हळ्यार सेवा ही दैवी आसा हे समजप गरजेचें. देखून पर्यटकांक अपेक्षित आशिल्ले सेवे खातीर सरकारान घेतिल्ले निर्णयात आमुलाग्र बदल हाडपा खातीर अतिथी देवो भवः वांगडाच आमका सेवा देवो भवः हो नारो दिवचो पडटलो, असो उलो खंवटे हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
