भांगरभूंय | प्रतिनिधी
नवी दिल्ली, खबरां संस्थाः 2023त संवसारांत कॅन्सराक लागून मरण आयिल्लांचो आंकडो 10.4 दशलक्षाचेर पावलो आनी नव्या दुयेंतींचो आंकडो 18.5 दशलक्ष जालो अशें लॅन्सेटांत उजवाडाक आयिल्ल्या नव्या विश्लेशणा प्रमाण दिसून आयलां. 1990 सावन अनुक्रमान 74 टक्के आनी 105 टक्क्यांनी ही वाड जाल्या. दरेकी 10 कॅन्सराच्या मरणांतल्या सुमार 4 लोकांक धूम्रपान, वायट आहार आनी रगतांतली साकर चड आसप अशा जोखीम घटकांकडेन संबंदीत आसा.
भारतांत कॅन्सराचे दुयेंती 2023 वर्सा सुमार 54.3 लाख मेरेन वाडले. ग्लोबल बर्डन ऑफ डिजीज कॅन्सर कोलॅबोरेटर्सच्या विश्लेशणा प्रमाण 2050 मेरेन संवसारभर उण्यांत उणें 30.5 दशलक्ष लोकांक नव्या कॅन्सराचें निदान जातलें, जाल्यार वर्सुकी मरण येवपाचें प्रमाण 75 टक्क्यांनी वाडून 18.6 दशलक्ष जावपाचो अदमास आसा.
भारतांत मरण येवपाक जापसालदार आशिल्ले मुखेल कॅन्सर
भारतांत मरण आनी दुयेंसांक जापसालदार आशिल्ले मुखेल कॅन्सर म्हणल्यार स्तन, फुफ्फुस, अन्ननलिका, तोंड, गर्भाशय, पोट आनी आतड्यांचो कॅन्सर अशें ह्या विश्लेशणाची सहकारी पब्लिक हेल्थ फाउंडेशन ऑफ इंडिया (PHFI) हे संस्थेची प्राध्यापक राखी दंडोना हांणी सांगलें.
भारतांत लोकसंख्येचेर आदारिल्लीं 38 कॅन्सर नोंदणी केंद्रां आसात, तातूंत सुमार 12% लोकसंख्येचो आस्पाव जाता. 2022 वर्सा वट्ट सुमार 14 लाख नवे दुयेंती आनी 9.10 लाख मरणां नोंद जाल्यात. भारतीय बायलांक स्तन, गर्भाशय आनी अंडाशयाचे कॅन्सर चड प्रमाणांत दिसतात, जाल्यार तोंड, फुफ्फुस आनी अन्ननलिका कॅन्सर दादल्यां मदीं चड प्रमाणांत दिसता.
2023 वर्सा संवसारीक कॅन्सराच्या मरणांतले 46 टक्के दादल्यां मदीं मुखेलपणान तंबाखू, अस्वस्थ आहार, चड सोरो पियेवप, वेवसायीक धोके आनी वायु प्रदुशण हांचो आस्पाव आशिल्लो. बायलां मदीं हें प्रमाण 36 टक्के आशिल्लें, तातूंत तंबाखू, असुरक्षित लैंगिक संबंद, अस्वस्थ आहार, मोटसाण आनी रगतांतली साकर चड आसप अशे मुखेल धोके आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
