भांगरभूंय | प्रतिनिधी
पणजीः म्हजे घर येवजणेचे उक्तावण 4 ऑक्टोबराक श्यामा प्रसाद मुखर्जी स्टेडियमांत सांजेच्या 4 वरांचेर जातले. हे कार्यावळीक केंद्रीय गृहमंत्री अमित शाह हाजीर आसतले. ह्या वेळार येवजणे खाला वेगवेगळी बांदकामा नियमित करपा खातीर अर्ज उपलब्ध करून दितले. फुडल्या स म्हयन्यांत नागरिकांक हे अर्ज भरचे पडटले अशी म्हायती मुख्यमंत्री डॉ. प्रमोद सावंत हांणी दिली. शेनवारा तांणी राज्यभरांतल्या पंचायतीं कडेन ऑनलायन संवाद सादलो. ह्या कार्यावळीक नागरिकांनी व्हड प्रमाणांत हाजीर रावपाचो उलो तांणी मारलो.
मूळ गोंयकारांक फायदो जावचो म्हूण सरकारान म्हजे घर येवजण सुरू करपाचो निर्णय घेतला. हातूंत धा वेगवेगळे घटक आसात. हाचे वरवीं 1972 पयलींची घरां नियमित करतले. कांय पंचायतींनी उच्च न्यायालयाचो भंय घालून घरां मोडपाचे आदेश जारी केल्यात. राजकी पक्षूय घरां मोडून उडयतले असो बोवाळ करतात. पूण म्हजे घर येवजणे खाला जर घराची नोंदणी 1972 पयलींच्या सर्व्हे प्लॅनाचेर आसत आनी फॉर्म 1/14 चेर नांव आसल्यार तें घर मोडून उडोवंक मेळचे ना.
अशा घरांचें सनाद प्रमाणपत्र मेळोवपा खातीर एक हजार रुपया शुल्क आकारतले. 4 ऑक्टोबर उपरांत सगल्या पंचायतींनी हे खातीर गरजेचे आशिल्ले अर्ज उपलब्ध करून दितले. हे येवजणे खाला 28 फेब्रुवारी 2014 पयलीं सरकारी, अल्वारा, मोकाशे जमनी वयली घरां नियमित करून क्लास 1 ऑक्युपन्सी दितले. हे खातीर कांय अटी पुराय करच्यो पडटल्यो. कोमुनिदादच्या जमिनी वयली 2014 वर्साची घरां नियमित करतले. हे खातीर कोमुनिदादची मान्यताय घेतल्या.
वयल्या दोनूय प्रकरणांत जमीन नियमित जाले उपरांत लावार्थ्यांक रोका कायद्या खाला बांदकाम नियमित करपा खातीर अर्ज करचो पडटलो. हाचे भायर खाजगी जमनी वयली 2000 वर्सा पयलीं बांदिल्लीं घरां एक खाशेलो दंड घेवन नियमित करतले. 20 कलमी कार्यावळी खाला मूळ लावार्थ्या कडल्यान घर विकतें घेतिल्ली कागदपत्रां आसल्यार तें घर नियमित करतले. मुरगांवांतल्या पुनर्वसन केल्ल्यांक 30 वर्सां आदीं दिल्ल्या 340 फ्लॅटांचे मालकी हक्क दितले अशें मुख्यमंत्र्यान सांगलें.
स्वयंपूर्ण इश्टांक 50 हजार रुपया मानधन
स्वयंपूर्ण इश्टांक 50 हजार रुपया मानधन दितले. पंचायतींनी तांकां दिल्ल्या निधीचो उपेग करचो. हे संबंदी स्वयंपूर्ण इश्टां कडल्यान अहवाल मागयतले. निधीच्या वापरा संबंदीं पंचायतींक मार्गदर्शन करतले अशें मुख्यमंत्र्यान सांगलें.
बेगीनूच परिपत्रक
सरकारान थारायिल्ल्या काळांत पंचायती आनी नगरपालिकांनी घर दुरुस्तीचें परवाने जारी करप गरजेचें आसा. घर दुरुस्तींत कितें आस्पावीत आसा हाचे विशीं बेगीनूच परिपत्रक जारी करतले अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
