भांगरभूंय | प्रतिनिधी
2 वर्सांत 4 लाख बालविवाह आडायले
नवी दिल्ली, खबरां संस्था ः बालविवाहाचेर बंदी हाडपाच्या कामगीरीत भारतांत बरीच उदरगत जाल्या. 2023 वर्सा सावन 4 लाख बालविवाह आडायल्यात. बालविवाह प्रतिबंधक कायदो लागू जाले उपरांत हो सगळ्यांत चड आंकडो. तीन वर्सांत बालविवाहांत 69% उणीव आयल्या.
संयुक्त राष्ट्रांच्या महासभे वेळार एका कार्यावळींत जाहीर केल्ल्या ‘टिपिंग पॉयट टू झिरो: एव्हिडन्स टूवर्ड्स अ चायल्ड मॅरेज फ्री इंडिया’ ह्या जस्ट रायट्स फॉर चिल्ड्रनच्या अहवालांत ही म्हायती दिल्या.
ही प्रथा नश्ट जावपाक 300 वर्सां लागतलीं असो अदमास संयुक्त राष्ट्र संघटनेच्या सरचिटणीसानी 2023त केल्लो. संवसारांतले एक तृतीयांश बालविवाह भारतांत जातात.
जस्ट रायट्स फॉर चिल्ड्रन हे संस्थेचे संस्थापक भुवन रिभू म्हणटात…
2023 वर्सा 257 जिल्हे वेंचून काडले, जंय बालविवाहाचे प्रमाण 23% परस चड आशिल्लें. 270 संघटनांनी वांटो घेतलो. जिल्ह्यांतल्या 50 गांवांनी फकत स लग्नां आडावपाचें काम दरेक संस्थेक दिल्लें. हाचो पुरावो पोर्टलाचेर अपलोड केल्लो. 25 सप्टेंबर मेरेन हो आंकडो 4 लाख 742 मेरेन पावलो.
भारतांतल्या बालविवाहा कडेन संबंदीत आंकडेवारी….
2023-24 वर्सा नागरी समाज, पंचायत आनी कायदेशीर हस्तक्षेपा वरवीं सुमार 73,501 बालविवाह आडायले. तातूंतले सुमार 59,364 पंचायतींनी आडायले आनी सुमार 14,137 कायदेशीर कारवाय करून आडायले.
नॅशनल कमिशन फॉर प्रोटेक्शन ऑफ चायल्ड रायट्स (NCPCR) च्या अहवाला प्रमाण भारतांतल्या 27 राज्यांनी आनी सात केंद्रीय प्रदेशांनी 1.15 दशलक्षां वयर भुरग्यांक बालविवाह जावपाचो चड धोको आसा. जातूंत उत्तर प्रदेशांत सगळ्यांत चड आसा.
नॅशनल क्रायम रेकॉर्ड ब्युरोच्या आंकडेवारी प्रमाण 2022 वर्सा बालविवाह प्रतिबंधक कायद्या खाला 3,563 बालविवाह प्रकरणां न्यायालयांत नोंद जाल्लीं, पूण तातूंतली फकत 181 प्रकरणां न्यायालयांत पावलीं.
देशांत बालविवाहाचें प्रमाण काळाप्रमाण उणें जालां. देखीक- युनिसेफ आनी हेर संघटनां प्रमाण 1990 ते 2005 मेरेन हें प्रमाण वर्साक सुमार 1% उणें जालां, आनी फाटल्या दशकांत वर्साक सुमार 2% उणें जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
