भांगरभूंय | प्रतिनिधी
पणजी: अर्थीक वर्स 2023-24त अर्थीक विकास म्हामंडळाक (ईडीसी) 69 कोटी रुपयांचो फायदो जाल्लो. अर्थीक वर्स 2024-25त तातूंत आठ कोटींची वाड जावन तो 77 कोटी रुपया जालो. हालींच ईडीसी संचालक मंडळाची 405वी बसका जाली. ह्या वेळार अध्यक्ष म्हूण मुख्यमंत्री डॉ. प्रमोद सावंत हाजीर आशिल्ले. हे बसकेंत 2024-25 तल्या ईडीसी लिमिटेडाच्या एकवटीत अर्थीक विवरणपत्रांक मान्यताय दिली.
हे बसकेंत गोंयाक आनीक घटमूट करपाचेर लक्ष्य दवरलें. बसकेंत सगले अजेंडा आयटम खंयच्याय मतभेदा बगर मंजूर जाले. 2024-25 ह्या अर्थीक वर्सा खातीर एकवटीत ताळेबंद, फायदो आनी लुकसाण खातें आनी रोख प्रवास विवरणपत्र आदींचेर चर्चा केली. 2024-25 ह्या अर्थीक वर्सा खातीर एकवटीत महसूल 137 कोटी रुपया आशिल्लो जाल्यार खर्च 60 कोटी रुपया आशिल्लो. कराचे पयलीं एकवटीत फायदो 77 कोटी रुपया आशिल्लो.
फाटल्या अर्थीक वर्सांत म्हणल्यार 2023-24त एकवटीत महसूल 119 कोटी रुपया, एकवटीत खर्च 49 कोटी रुपया आनी करा पयलीं 119 कोटी रुपया, एकवटीत खर्च 49 कोटी रुपया आनी करा पयलीं एकवटीत फायदो 69 कोटी रुपया आशिल्लो. बसकेंत संचालकांचो वर्सुकीं अहवाल मंजूर केलो आनी 50व्या वर्सुकी साबार बसकेची तयारी सुरू केली. बसकेंत मुख्यमंत्री डॉ. सावंत हांणी स्वयंपूर्ण गोंया विशींचो दिश्टीकोण परतून एकदां समजावन सांगलो. अर्थीक स्वावलंबन आनी लोकांच्या विस्वासांत आदर्शवत म्हूण काम करपाचें आवाहन केलें.
मुख्यमंत्र्यांनी गोंयच्या विकास येवजण्यां विशीं अदीक जनजागृताय करपाचें आवाहन केलें. ईडीसी सारक्यो संस्था धोरण आनी लोकां मदली दरी भरून काडपाक म्हत्वाची भुमिका वठयतात अशेंय तांणी सांगलें.
स्वयंपूर्ण गोंय हें फक्त एक घोशवाक्य न्हय जाल्यार एक मोख आसा. मंडळान गोंयच्या उद्देगीक मळाक चालना दिवपी आनी उपेक्षीत समुदायांक मजत करपी प्रस्तावांक तेंको दिवचो अशी सुचोवणी मुख्यमंत्र्यांनी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
