भांगरभूंय | प्रतिनिधी
म्हापशेंः गांवांत, नादोडा-बार्देसच्या ऍन्थनी नोरोन्हा हांच्या वाहन पार्कींग शेडींतल्या वाहनांक उजो लागलो. हे घडणुकेंत तीन इलॅक्ट्रीक बायक सयत चार दुचाकी लासून गोबोर जाल्यो. जाल्यार इलॅक्ट्रीक गाडयेचें मात्शें लुकसाण जालें. हे सगलें मेळून सुमार 12 लाखांचें लुकसाण जालें. शॉर्ट सर्कीटाक लागून ही घडणूक घडिल्ल्याचो अदमास वाहन धनयान उक्तायला.
शुक्रारा सकाळीं सुमार 2.15 वरांचेर ही घडणूक घडली. नोरोन्हा कुटूंबियांनी आपल्या वाहन पार्कींग शेडींत एक गाडी आनी चारचाकी सदां भशेन पार्क केल्ली. हातुंतल्या जीए 03 झेड 6989 क्रमांकाची टाटा टिगर ही इलॅक्ट्रीक गाडी चार्जींगाक लायिल्ली. उपरांत शेडींतल्या वाहनांक अचकीत उजो लागलो. दुचाकींक उजो लागतांच फुटिल्ल्याचो व्हडाव्हडान आवाज तशेंच धुंवर येवंक लागिल्ल्यान नोरोन्हा कुटुंबियांनी घरा भायर धांव घेतली. तांकां शेडींतल्या वाहनांक उजो लागिल्ल्या समजतांच चार्जींगाक लायिल्ली गाडी नोरोन्हा हांकां भायर काडपाक येस आयलें. उपरांत हे विशींची म्हायती उजो पालोवपी दळाक दिली. म्हापशें उजो पालोवपी दळाच्या जवानांनी घडणुके सुवातेर पावन सुमार पावण वरान उज्याचेर नियंत्रण हाडलें. तो मेरेन जीए 03 एएक्स 9949, जीए 03 एएक्स 5824, जीए 03 एक्यू 4729 ह्यो इलॅक्ट्रीक बायकी आनी जीए 03 एबी 5941 ही सुझूकीची बायक लासून गोबोर जाली. तशेंच ह्या उज्यांत टाटा टीगर गाडये सयत पार्कींग शेड आनी घरांतल्या वीज उपकरणांचें लुकसाण जालें.
म्हापशें उजो पालोवपी दळाचे उपअधिकारी ज्ञानेश्वर सावंत, एस.ए. कळंगुटकार, व्ही.आर. नायक, रिचर्ड त्रिनिदाद, सी.बी. नायक आनी एस.आर. नायक ह्या जवानांनी उजो पालयलो
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
