भांगरभूंय | प्रतिनिधी
श्रमधामाचीं घरां मडकय, वाळपय कित्याक बांदूंक नात?
पणजी : रमेश तवडकार हांणी म्हाका सोंपोवपाची सुपारीच घेतल्या. एका भस्मासुरा कडल्यान तांणी ही सुपारी घेतल्या. फाटल्या साडेतीन वर्सां सावन भ्रश्टाचाराचे आरोप वा हेर मार्गान म्हाका सोंपोवपाचे यत्न चल्ल्यात, असो आरोप भाजपचे आमदार गोविंद गावडे हांणी केलो. ते हेड आॅन कार्यावळींत उलयताले.
रमेश तवडकार आनी गोविंद गावडे हांचे मदीं फाटल्या कितल्याशाच दिसां सावन आरोप प्रत्यारोप सुरू आसात. आपले खातीर हो विशय सोंपिल्ल्याचें विधान मंत्री तवडकार हांणी फाटल्या सप्तकांत केल्लें. उपरांत आतां गोविंद गावडे हांणी हो आरोप केलो.
रमेश तवडकार हे श्रमधाम येवजणे खाला विवीध सुवातांचेर घरां बांदतात. प्रियोळ मतदारसंघांत तांणी सात घरां बांदल्यांत. हाका हांव येवकार दितां. तांणी मडकय, वाळपय, सांखळे वा साश्टींतल्या मतदारसंघांत घरां कित्याक बांदूंक नात? प्रियोळात घरां बांदपाचे कृतीक राजकी वास आसा. हीं घरां बांदपाक तांकां कोणें सांगलीं? म्हाका सोंपोवपाची सुपारी तांकां दिल्ल्याचें स्पश्ट जाता, अशें गावडे हांणी म्हणलें.
शेणाच्या थाप्यार फांतर मारपाची इत्सा ना, अशें विधान तवडकार हांणी गोविंद गावडे विशीं उलयतना केलें. हे विशीं गोविंद गावडे हांणी सांगलें, रमेश तवडकार हे शिक्षक आसूनय तांकां शेणाचो थापो, देवचार हाचें म्हत्व खबर ना. शेणाचो थापो, देवचाराच्या वाठारांतूच म्हजें आयुश्य गेलां. शेणाचो थापो पवीत्र आसता. देवचार होय देवूच आसता. जायते जाण देवचाराक पायां पडटात, अशें गावडे हांणी म्हणलें.
तवडकार आदीं सभापती आशिल्ले. मंत्रिपद जरी मेळ्ळें तरी तांची पदावनती जाल्ल्यान ते वैफल्यग्रस्त जाल्या. मंत्रीपद नाका आसलें जाल्यार मंत्रिपदा खातीर गल्ली ते दिल्ली मेरेन कित्याक प्रवास केलो? हांव मंत्री आसतना तांणी भ्रश्टाचाराचे आरोप केल्ले. म्हाका मेळिल्ल्या खात्यांत भ्रश्टाचाराची संद नाशिल्ली. म्हजे कडलीं खातीं आतां तांकां दिल्यांत. आतां त्या खात्यां कडेन निधी नाशिल्ल्याचें सांगतात. हातुंतल्यान जायत्यो गजाली स्पश्ट जातात अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
