भांगरभूंय | प्रतिनिधी
दैवाधीन दुख्ख भरता दोश ना कोणाचो….हें श्रीरामान कितले फावट सांगल्यार पसून भरताच्या दोळ्यांतलें उदक कशेंच उणें जायना जालें. तो परतो परतो श्रीरामांक आग्रह करतालो. तुं परत यो, राज्याभिशेक करून घे.
भरता भशेनूच भरता वांगडां आयिल्या ऋशीजनांनीय आग्रह केलो, पूण श्रीरामान नमळायेन तांकां न्हयकार दिलो. श्रीराम म्हणपाक लागले, ‘भरता, पिताश्रींचे आज्ञेन म्हाका वनवास आनी तुका शिंवासन मेळ्ळां, तु परतून वच आनी अयोध्येचें राज्य कर, हेंच धर्माक धरून आनी योग्य आसा.’ पिताश्री वचना प्रमाण चौदा वर्सां वनवास भोगून हांव सीता- लक्ष्मणा सयत अयोध्येक येतलों.’ श्रीरामाच्या ह्या उतरांनी निरशेल्ल्या भरतात हीं उतरां सोंसपाक जालीनात. ताणें श्रीरामाच्या पादुकांक हात लायतो आनी करुण स्वरान सांगपाक लागलो-
–
मागतां तुमच्यो पादुका
–
तात गेले, माय गेली आस म्हजी आयका।
अनाथ जालो भरत आतां मागतां तुमच्यो पादुका ॥धृ॥
गरुडाची भरारी ती जीव जंतुंक येवची ना।
हतयाचो भार कसोच घोड्या फाटीर रावचो ना।
राघवाचें राज्य करप अशक्य तें रे म्हाकां ।।1।।
कुळ रीत हेंच सांगता, ज्येश्ठ तो शिंवासनी।
धाकट्याक शिंवासन शें आनी ज्येश्ठ भोंवतां रानानी?
दान दितां राज्य कशें, तुं ह्या चरण सेवका ।।2।।
वेश तपस्याचो घेतलो, सोडटना हांवें देश तो।
कैकयीसम कित्याक घेंव हांव, म्हज्या माथ्यार दोश तो।
कसलो आदेश वेगळोच हो दिता तुमी ह्या बाळका ।।3।।
स्थापितां हांव पादुका ह्यो म्हज्या पित्याच्या आसनी।
ह्योच चलयतल्यो राज्य सगळें कुशलतेन शासनी।
चरण तीर्थ पुजेन जावचें पुराय सार्थक म्हाका।।4।।
प्रभु ना तरी पादुका हांव स्थापिता शिंवासनी।
रावतलों हांव खंयतरी नगर सीमा सोडुनी।
सुर्याचीं किरणां तीं रे सांजचो जाता दिपीका ।।5।।
चलयतां हांव राज्य रामा तुमी येता तो मेरेन।
वर्सा वर्सा मेजतलों हांव वाट पळयत ते मेरेन।
कमळा भशेन रावतां राज्यांत राज्य तें नाका म्हाका ।।6।।
आयलें ना जर चरण तेन्ना म्हाकां दिवन रे वचन।
त्या खिणाक दिता अग्निक अर्पित हांव म्हजें तन।
लावून मस्तकाक चरण धुळ ती पण म्हजो सांगतां तुकां ।।7।।
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
