भांगरभूंय | प्रतिनिधी
पणजी : 2016 त होंडा- वाळपय कुटुंबीक वादांतल्यान आपले 20 वर्सां पिरायेचे धुवेची हत्या केल्ल्या प्रकरणांत आनी दुसरे धुवेचेर जीवघेणो हल्लो केल्ल्या प्रकरणांत बाल न्यायालयान दुबावीत बापूय शंकर रेड्डी हाका जल्मठेप आनी चार लाख रुपयांच्या दंडाची ख्यास्त फर्मायल्या. बाल न्यायालयाची अध्यक्ष सई प्रभुदेसाय हांणी हो आदेश दिलो.
ह्या प्रकरणांत वाळपय पुलिसांनी 1 जून 2016 ह्या दिसा गुन्यांल दाखल केलो. ते प्रमाण दुबावीत शंकर रेड्डी हांणी कुटुंबीक वादांतल्यान रागाच्या भरांत व्हडली धूव सुजाता हिचेर कोयत्यान वार केल्लो. त्या वेळार सुजाताची धाकटी भयण गौरी तिका वाटावपाक गेल्ली तेन्ना दुबावितान तिचेरूय कोयत्यान वार केल्लो. त्या वेळार सुजाताक मरण आयिल्लें जाल्यार गौरी गंभीर जखमी जाल्ली. तिका तत्काळ हॉस्पिटलांत दाखल केल्ली.
हाची म्हायती मेळटाच वाळपय पुलीस स्टेशनाचे तेन्नाचे निरिक्षक दीपक पेडणेंकार हांणी ह्या प्रकरणांत गुन्यांव दाखल करून तपास केलो.
घडणूक घडले उपरांत दुबावीत शंकर रेड्डी पळून गेल्लो. ताका 2 जून 2016 ह्या दिसा अटक केल्ली. ते उपरांत वाळपय पुलिसांनी तपास पुराय करून खून आनी जीवघेणो हल्लो प्रकरणांत दुबावीत शंकर रेड्डी हाचे आड 2016 त बाल न्यायालयांत आरोपत्र दाखल केल्लें.
ह्या प्रकरणांत न्यायालयान प्रथमदर्शनी पुराव्याची दखल घेवन दुबावीत रेड्डी हाचे आड आरोप निश्चीत करून खटलो सुरू केलो. ह्या प्रकरणांत सरकारी वकील कृष्णा संझगिरी, मिलेना पिंटो आनी थेमा नार्वेकार हांणी युक्तीवाद मांडले. तातूंत तांणी कोयत्याचेर तशेंच घडणुकेचे सुवातेर सांपडिल्ल्या रगताच्या नमुन्यांचो अहवाल सकारात्मक आयिल्ल्याचो युक्तीवाद मांडून दुबविता आडचे पुरावे सिद्ध केले. ते भायर जीवघेणो हल्लो जाल्ले गौरी हिणें दिल्ली साक्ष म्हत्वाची थारली. वैजकी अहवाल आनी हेर पुराव्यांची दखल घेवन बाल न्यायालयान दुबावीत शंकर रेड्डी हाका दोशी थारावन जल्मठेप आनी एक लाख रुपयांची दंडाची ख्यास्त फर्मायली. धाकटे धुवेचेर जीवघेणो हल्लो केल्ल्या प्रकरणांत एका लाखाचो दंड तशेंच गोंय बाल कायद्या खाला 20 वर्सांची खर कश्टाची बंदखण तशेंच दोन लाख रुपयांचो दंड अशी ख्यास्त दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
