भांगरभूंय | प्रतिनिधी
ममता येवजणे खातीर अर्ज करपाचो काळ वाडयलो
दिव्यांग बायलां सरकारी कर्मचाऱ्यांक 3 हजारांचो भत्तो
फॅक्टरींत कठीण कामां खातीर बायलांचे नेमणुकेक परवानगी
भांगरभूंय । प्रतिनिधी
पणजी : गोंय सरकारान बायलांक नवरात्रांची भेट दिल्या. बायलां आनी भुरगीं कल्याण कात्यान ममता येवजणे कातीर अर्ज करपा खातीरचो काळ वाडोवन दोन म्हयने केला. कार्मीक खात्यान दिव्यांग बायलां सरकारी कर्मचाऱ्यांक म्हयन्याक 3 हजार रुपया भत्तो दिवपाचो निर्णय घेतला. तशेंच कारखाने आनी बाश्पक खात्यान फॅक्टरींत कठीण कामां खातीर बायलां कामगारांचे नेमणुकेक परवानगी दिल्या. हे विशीं हालींच तीन परिपत्रकां काडून नवे आदेश जारी केल्यात.
गोंयांतल्या चलयांचें लींग प्रमाण सुदारवचे कातीर ममता येवजण सुरू केल्ली. ते प्रमाण खंयच्याय अर्थीक, समाजीक प्रवर्रगांतले बायलेन चलयेक जल्म दिल्यार तिच्या खात्यांत 10 हजार रुपया जमा करतात. पयल्या दोन चलयांच्या जल्मा खातीर ही मजत दितात. हे आदीं येवजणे खातीर चलयेच्या जल्मा उपरांत 45 दिसां भितर अर्ज सादर करचो पडटालो. आतां तातूंत बदल करून हो काळ 60 दिसांचो केलो. ते खातीर बायलेची नोंदणी आशिल्ले वैजकी संस्थेंत प्रसुती जाल्ली आसप गरजेचें आसा. बायल उण्यांत उणी तीन वर्सांत गोंयांत रावपी वा गोंयचे व्यक्ती वांगडा लग्न जाल्ली आसप गरजेचें आसा. दुसऱ्या परिपत्रका प्रमाण कारखाने आनी बाश्पक खात्यान फॅक्टरींतल्या धोकादायक कामां खातीर बायलां कामगारांचे नेमणुकेक परवानगी दिल्या. हे आदीं अशीं कामां करपाक बायलांक परवानगी नाशिल्ली. नव्या परिपत्रका प्रमाण अश्या सुवातांचेर बायलां कामगारांक फावोशी सुरक्षा दिवप, तांची भलायकी बरी उरची हे खातीर उपाय येवजण करप गरजेचें आसा. अशें आसलें तरी लेगीत गुरवार बायलो आनी भुरग्याक दूद दिता अश्या आवयांक धोकादायक कामां करपाक परवानगी दिवचे नात, अशें स्पश्ट केलां. हे विशीं मसुदो अधुसुचोवणेचेर कसलीय हरकत, सुचोवणी येवंक नाशिल्ल्यान नवे नेम लागू केल्यात.
दिव्यांग बायलां कर्मचाऱ्यांक मेळटलो विशेश भत्तो
गोंय सरकारान दिव्यांग महिला सरकारी कर्मचाऱ्यांक विशेश भत्तो दिवपाचो निर्णय घेतला. ते प्रमाण उण्यांत उणे 40 टक्के दिव्यांग बायला सरकारी कर्मचाऱ्यांक तांच्या भुरग्यांच्या संगोपना खातीर म्हयन्याक 3 हजार रुपया भत्तो दितले. भुरग्याच्या जल्मा सावन ते भुरगें 2 वर्सांचें जाय मेरेन हो लाव मेळटलो. हो आदेश 1 जुलय 2025 सावन लागू जातलो. हे विशीं केंद्रीय कार्मीक खात्यान सातव्या वेतन आयोगाचे शिफारशी प्रमाण सगल्या राज्यांक हो आदेश दिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
