भांगरभूंय | प्रतिनिधी
पणजी : लोकसभा वेंचणुकेंत आम आदमी पक्ष इंडिया आघडीत कॉंग्रेस पक्षा वांगडा आशिल्लो. उपरांत कॉंग्रेसीन सेगीत आपच्या फाटींत सुरो घातलो. सभापती वेंचणुकेंत आमी कॉंग्रेस उमेदवार एल्टन डिकोस्टा हांकां फाटबळ दिलें. अशें जरी आसलें तरी ह्यान फुडें कॉंग्रेसीक कसलेच तरेचें सहकार्य करचे ना अशें आमदार क्रुझ सिल्वा हांणी सांगलें. बिरेस्तारा पर्वरे जाल्ले पत्रकार परिशदेंत ते उलयताले. ह्या वेळार आमदार व्हेंजी व्हिएगस हजर आशिल्ले.
सिल्वा हांणी म्हणलें, लोकसभेंत आपान कॉंग्रेस उमेदवारा खातीर प्रचार करून तांकां वेंचून हाडिल्ले. विधानसभेंतूय आपाने कॉंग्रेसीक सदांच साथ दिल्या. दरेक फावटीं आप विरोधी पक्षा वांगडाकच रावलें. अशें जरी आसलें तरी सध्या दिल्लीच्या कॉंग्रेस अध्यक्षांचो एक व्हिडीओ जारी जाला. हातूंत तांणी 2025चे दिल्ली विधानसभा वेंचणुकेंत आपाक धोको दिल्ल्याचें स्पश्टपणान कबूल केलां. हाचो निशेध म्हणून आमी ह्यान फुडें गोंयांत कॉंग्रेसीक फाटबळ दिवचे ना असो निर्णय घेतला.
आमदार व्हिएगस हांणी, हो व्हिडियो हालींच प्रसारीत केला. त्यान पयलीं आमी एल्टन डिकॉस्टा हांकां फाटबळ दिवपाचें कबूल केल्लें. सभापती पदाचे वेंचणुकेंत आमी आमचें वचन पाळ्ळां. मात ह्यान फुडें आमी कॉंग्रेसी वांगडा आसचे ना. सध्या कॉंग्रेस पक्षांत कसलीच नैतिकता उरूंक ना. कॉंग्रेस आमदारांनी पक्षांतर करून ह्यान पयलीं गोंयचे जनतेक फटयल्या. अशा तत्वहीन पक्षा वांगडा आमकां रावपाचें ना. आपाक गोंयांत गंभीरतायेन काम करपाचें आसा. हाका लागून जनतेन आमचो निर्णय समजून आमकां साथ दिवची.
बेगीनूच भाजपाची गुंडगिरी कँपेन
आपान गोंयांत भाजपाचें बुराक अभियान राबयिल्लें. हाका बरो प्रतिसाद मेळ्ळो. सध्या राज्यांत कायदो आनी सुवेवस्थेची वाट लागल्या. हाका लागून आमी बेगीनूच भाजपची गुंडगिरी कँपेन सुरू करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
