भांगरभूंय | प्रतिनिधी
कदंब कर्मचार्यांचोय आसपाव आसतलो : मडगांवां निदर्शनां
मडगांव : इलॅक्ट्रीक बसीचे ड्रायव्हर कंत्राटी आसात. मात ते कदंब बस ड्रायव्हरां इतलेंच काम करतात. तांकांय उण्यात उणो 40 हजार पगार मेळपाक जाय. पोरण्या बसींचे स्थिती कडेन लक्ष दिवचें. ड्रायव्हरां खातीरचे कुडीं कडेन आनी हेर सेवां कडेनूय लक्ष दिवचें. 30 सप्टेंबर मेरेन हें जावंक ना जाल्यार कदंब कर्मचार्या सयत इलॅक्ट्रीक बस ड्रायव्हर संप करतले, अशी शिटकावणी ऑल इंडिया ट्रेड युनियन कॉंग्रेसीचे सरचिटणीस ख्रिस्तोफर फोन्सेका हांणी दिली.
मडगांवच्या कदंब बसस्टॅण्डा लागसार डेपो भायर इलॅक्ट्रीक बस ड्रायव्हरां सयत निदर्शनां केलीं. ह्या वेळार ऑल इंडिया ट्रेड युनियन कॉंग्रेसीचे सरचिटणीस ख्रिस्तोफर फोन्सेका, कदंब ड्रायव्हर कंडक्टर संघटणेचे अध्यक्ष चंद्रकांत चोडणकार हेय हाजीर आशिल्ले.
फोन्सेका हांणी सांगलें, इलॅक्ट्रीक बसी घेवन दोन वर्सां जाल्यांत. तांचें कंत्राट एके कंपनीक दिलां. ते बसीचो सांबाळ, दुरुस्तीचीं कामां योग्य तरेन जायनात. ड्रायव्हरांनी सेगीत सांगून लेगीत बसी वाटेर बंद पडपाचे प्रकार घडटात. तशेंच बसीच्या ड्रायव्हरांक कपडे बदलपा खातीर दिल्ले कुडीची अवस्था सामकी वायट आसा. भायर सोरोप भोंवतात. नितळसाण ना, आनीकूय जायत्यो समस्या आसात. कोणूच लक्ष दिना. इलॅक्ट्रीक बसीच्या ड्रायव्हरांक डबल ड्युटी दितात. मात गरज आसा तितलो पगार दिनात. दिसा 600 रुपया इतलो उणो पगार तांकां मेळटा. कदंबाच्या बस ड्रायव्हरांकूय 40 हजार रुपया पगार आसा. मात 2 कोटींची इलॅक्ट्रीक बस चलोवप्याक 18 ते 20 हजार पगार मेळटा. कंत्राटार जरी आसले तरी कायदो आनी कामा प्रमाण पयशे मेळचे. तांकां दर वर्सा 3 टक्के वाड, म्हारगाय भत्तो आनी हेरूय भत्ते मेळचे अशी मागणी फोन्सेका हांणी केली.
कदंब महामंडळ, एस. व्ही. ट्रान्स्पोर्ट कंपनी वा येरादारी खातें हाची दखल घेना. हाका लागून सरकाराक युनियनान केल्ल्या पत्राचेर फुडल्या पंदरा दिसांनी निर्णय जावंक ना जाल्यार आंदोलन वा संपाचो निर्णय घेतले. हातूंत कदंबाचे कर्मचारीय वांटेकार जातले, अशी शिटकावणी फोन्सेका हांणी दिली.
कदंब बसचालक, वाहक, संघटना अध्यक्ष चंद्रकांत चोडणकार हांणी, कदंब कर्मचार्यांची संघटनाय ह्या इलेक्ट्री बस चालकां वांगडा आसा. तांकां गरजेची सेवा, पगार मेळपाची गरज आसा. डबल ड्युटी दितना चालकाक आठ वरांचो विसव जाय. हाका लागून 30 सप्टेंबर मेरेन निर्णय घेवंक ना जाल्यार संपाचो निर्णय घेवन कदंब बसी, इलॅक्ट्रीक बसी आनी माझी बसी बंद दवरतले, अशें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
