भांगरभूंय | प्रतिनिधी
कुं डय उद्देगीक वसणुकेच्या येरादारी जुंव्यां लागीं रस्त्यारूच दवरिल्ली एक रिक्षा कांय म्हयन्यां सावन हांगासरल्या मोबायल टॉवराक जनरेटराच्या माध्यमांतल्यान विजेची पुरवण करताली. उद्देगीक वसणूक आशिल्ल्यान अवजड वाहनां दीसपट्टीं येत आसतात. तशेंच फोंडें- पणजी म्हामार्ग आशिल्ल्यान येरादारीची संख्याय चड आसता. येरादारीचेर नियंत्रण हाडपा निमतान येरादारी पुलीस हांगा लोकांक आनी पर्यटकांक सदांच ‘तालांव’ दीत आसतात. पूण येरादारीक आडखळ थारपी ही रिक्षा केन्नाच तांकां दिसली नासुये, म्हूण विरोधी पक्षांतल्या एका आमदारान हालींच जाल्ल्या विधानसभा अधिवेशनाच्या शुन्य वराक हो विशय मांडलो आनी दोन-तीन दिसां भितरूच ही रिक्षा गायब जाली. सांगपाचें तात्पर्य इतलेंच की, येरादारी पुलिसांक थंय गस्त घालीत आसतना ही रिक्षा तांकां केन्नाच दिसून आयली ना. पूण पर्यटक मात दिसताले.
पुलिसांक ही रिक्षा कित्याक दिसली ना आनी तांचे ह्या मोबायल टावरा कडेन कसलें ‘कनेक्शन’ आशिल्लें हो तपासपाचो विशय आसा. गोंयच्या पुलिसांक अशें खूब कितें दिसना आनी दिसून आयल्यार लेगीत ते पळोवन पळयनाशिल्ले भशेन करतात.
गोंय पुलिसांनी मंगळारा ही कार्यावळ आयोजीत केली आनी थंय तांणी कांय लोकांक आपोवन तांचे शेणिल्ले वा चोरयेक गेल्ले मोबायल फोन दिले. जांकां तांचे मोबायल परतून मेळ्ळे तांकां खोस जालीच. तेच बराबर तांणी पुलिसांक शुभेत्साय दिल्यो. शेणिल्ले सुमार 50 मोबायल फोन सोदून काडिल्ल्याचें पुलिसांनी सांगलें. हो आंकडो तसो व्हड दिसलो तरी तो तसो व्हड न्हय, कारण फाटल्या पांच वर्सांत 39,230 मोबायल शेणिल्ल्याच्यो कागाळी पुलिसां कडेन आयल्यात आनी फेब्रुवारी 2025 मेरेन फक्त 1632 मोबायल फोन सोदून काडपाक तांकां येस आयलां. म्हणल्यार चार टक्के मोबायल परतून मेळ्ळे. आतां हातूंत आनीक 50 मोबायल फोनाची भर पडल्या.
सनबर्न सारक्या ईडीएम फेस्टिव्हलाक हजारांनी रुपयांची तिकेट खरेदी करून येवपी संगीत मोग्यांचोय मोबायल शेणटा, आनी तो फक्त दोन-तीन दिसां भितर पुलीस सोदून काडटा. कारण तो मोबायल म्हारग आसता. एक लाख ते देड लाख मेरेन. हे ‘हाय अॅण्ड’ मोबायल सोदले उपरांत पुलीस कागाळदारा बराबर फोटू काडटात आनी प्रसार माध्यमांचेर तांचो फोटो उजवाडा येता. सोदून काडिल्ल्या मोबालाचें स्रय घेतना, आपल्याक जे जमलें ना ताचेंय स्रय पुलिसांनी घेवंक जाय. शेणिल्लो मोबायल सर्वेलन्सार दवरला काय सीआयआर पोर्टलार ताची म्हायती नोंद केल्या अशें सांगून चलचें ना.
मंगळारा सोदून काडिल्ले 50 मोबायल जांचे कडेन सांपडले, तांची चवकशी करून जाणें मोबायल चोरलो वा परत केलो ना तांचेर कारवाय जावंय जाय. चोरयेक गेल्ल्या मोबायलाचे सुटे भाग विकतात बी काय, हाचेरूय तपास जावंक जाय. पूण ते खातीर इत्साशक्त आसची पडटा आनी लोकांची सेवा करपा खातीर घेतिल्लो सोपूत पाळचो पडटा.
2023-24 ह्या वर्सा नव्या वर्साच्या येवकारा खातीर गोंयांत आयिल्ल्या कितल्याशाच पर्यटकांचे मोबायल फोन उत्तर गोंयच्यान चोरयेक गेल्ले. तातूंतले 90 मोबायल मेळिल्ले आनी पुलिसांनी तीन टोळयेंतल्या 20 कथीत चोरांक धरिल्ले. ह्यो टोळयो अस्तंत बंगाल, महाराष्ट्र आनी उत्तर भारतांतल्या राज्यांतल्यो आशिल्ल्यो अशेंय पुलिसांनी सांगिल्लें. अश्यो टोळयो गर्देच्या कार्यावळींनी वचून मोबायल चोरतात अशी म्हायती पुलिसांक आसल्यार तांणी पयलीच कारवाय करूंक जाय. पूण तशें कांय जातना दिसून येना.
गोंयांत 39320 मोबायल चोरयेक गेले आनी आतां मेरेन फक्त चार टक्के मोबायल सांपडले. हातूंत कसलोच विक्रम ना. कांय म्हयन्यां पयलीं फोंड्यां एके तरणाटेन आपलो मोबायल राय (साश्ट) हांगा शेणिल्ल्याची कागाळ फोंडें पुलीस स्टेशनार केली. हे तरणाटेचो बापूय स्वता पुलीस सेवेंत आसून लेगीत ते तरणाटेक आपलो मोबायल परतून मेळ्ळो ना. अश्यो हजारांनी तरणाट्यो, तरणाटे आनी ज्येश्ठ नागरीक आपलो मोबायल परतून मेळटलो हे आशेन आसतले. तांच्यो आशा अशा सुस्त पुलीस पद्दतीन खोशयेंत रुपांतरीत जावंक शकता व्हय?
सुस्त पुलीस पद्दत म्हणपा फाटलीं कितलींशींच कारणां हांव दिवंक शकतां. कांय म्हयन्यां पयलीं एका तरणाट्यान फोंडेंच्या एका बँकेच्या ‘कॅश डिपोझीट’ मशिना वरवीं पयशे भरले. पूण ताचे ते 22 हजार रुपया कांय वेळान मशिनांतल्यान भायर आयले आनी ताचे उपरांत आयिल्ल्या एका मनशान ते पयशे उबारले. हे घडणुकेची सीसीटीव्ही फुटेज पुलिसांक दाखोवन लेगीत अजून पयशे मेळिल्ले नात. पयशे उबारिल्लो हो मनीस कोण आशिल्लो आनी ते पयशे खंय आसात, हें पुलिसांक खबर ना? नासत जाल्यार अशी ‘आवटडेटेड’ आनी भ्रश्ट यंत्रणा दवरून पुलीस लोकांक न्याय दितले व्हय?
रातच्या वेळार खंयूय चोरी जाली वा खंयूय हेर गुन्यांव जायत जाल्यार 24 वरांत गुन्यांवकारांक धरिल्ल्याची शाबासकी पुलीस घेतात. 24 वरांत गुन्यांवकारांक धरपा खातीर जी यंत्रणा वापरतात, ती वा ते तांकीची यंत्रणां वापरून लोकांचे चोरयेक गेल्ले वा शेणिल्ले मोबायल परतून करूंक जाय. हें जमलें ना जाल्यार उदका पुरवणे खातीर सरकारान जशे वेगळे विभाग स्थापन केल्यात, तशे मोबायल सोदपा खातीर नवे विभाग स्थापन करपाचो प्रसंग गृह खात्याचेर येतलो.
फाटल्या पांच वर्सांत शेणिल्ले वा चोरयेक गेल्ल्या 39230 मोबायलांचें मोल कोट्यांनी रुपया आसतलें. ह्या सगल्या कागाळदारांक गोंय पुलिसांचो अभिमान दिसतलो व्हय? आनीक कित्याक दिसचो?
संजय बोरकार
9921343430
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
