नियोजन शुन्य इमारतीच्या कामांक लागून पाट्यार पार्किंगेचें कोंफुसांव

भांगरभूंय | प्रतिनिधी

इमारतीच्या बांदकामांक लागून दुचाकी चालक रेब्यांत घेतात लोळण

पणजीः पाटो प्लाझार वेवस्थीत नियोजन जावंक नाशिल्ल्यान कारणान पार्किंगेच्यो भोयो भोयो जावन पडल्यात. ज्यो पोरण्यो व्हडल्यो इमारती आसात तांकां पार्कींग नाशिल्ल्या कारणान ह्या इमारतींनी कामाक येवपी लोकांक रस्त्यार गाडयो पार्क करच्यो सोडून दुसरो आनीक पर्याय ना. दुसरे वटेन पाट्यार जे नवे प्रकल्प येतात तांचे आडबडीत काम चालू आशिल्ल्या कारणान रस्त्यार पांय बुडटा इतलो चिखल भरला. सद्या पाट्यार साधन सुविधांचे बारा बिरेस्तार जावन उरल्यात आनी लोकांक तांचो गरजे भायर त्रास सोंसचो पडटा.

सकाळच्या कामा वेळार जर मोटार घेवन पाट्यार कोणूय आयलो आनी ताका पार्कींग मेळत जाल्यार तो खरो भाग्यवान. सकाळीं 9 ते सांजे 6 वरां मेरेन पाट्यार पार्कींग सोदप कुस्तार जालां. मोटारीच न्हय सादी दुचाकीक सुवात सोदपा खातीर लोकांक वळवळे काडचे पडटात.

लोक वेळ वाटावपा खातीर दुचाकी घेवन येवप पसंत करतात, पूण दुचाकींक लेगीत पार्कींग नाशिल्ल्या कारणान दुचाकी फुटपाथार उब्यो केल्ल्यो नदरेक पडटात. तशेंच दुचाकी खातीर नियोजीत केल्ले पार्किंगेंत एक दुचाकीच्या जाग्यार फाटोफाट चार-पांच दुचाक्यो पार्क केल्ल्याचें दिसून येता.

पाट्यार आशिल्ल्या सरकारी कचेऱ्यांनी आपली कामां करपा खातीर गोंयभर सावन हजारांनी लोकांची गर्दी पडटा. पर्यटन खातें, नगर नियोजन खातें, उपनिबंधकाची कचेरी, श्रम शक्ती भवन, सेंट्रल वाचनालय, पासोपोर्ट कचेरी, गोंय दर्यादेग वेवस्थापन प्राधिकरण, रेरा ह्या कचेऱ्यांनी शेकड्यांनी लोक आपले अर्ज करपा खातीर येतात. तशेंच हेर इमारतींनी खूबश्या खाजगी कार्यालयांनी शेंकड्यांनी लोकांची हजेरी आसता. पूण ह्या शेंकड्यांनी येवपी लोकां खातीर पार्कींग ही गंभीर समस्या जावन उरल्या.

स्मार्ट सिटीच्या वरिश्ठ अधिकाऱ्यान दिल्ले म्हायती प्रमाण स्मार्ट पार्कींग यंत्रणे वरवीं पाट्यार 625 चारचाकी वाहनां उबी करपाची तांक आसा. स्मार्ट सेन्सरा वरवीं पार्कींग सुवात रिती जाल्या काय सुवात घेतल्या हें कळटा. पूण दुचाकीं खातीर स्मार्ट पार्कींग यंत्रणेचो आस्पाव जावंक ना. देखून पाट्यार दुचाकी उबी करपा खातीर कितली तांक आसा हे विशींची म्हायती ना.

पाट्यार इमारती बांदचे पयलीं त्या इमारती भितर पार्किंगेचें नियोजन जावंक नाशिल्ल्या कारणान आतां पार्किंगेचे गंभीर समस्येक तोंड दिवचें पडटा.

पाट्यार पयली बांदिल्ल्या व्हडल्या इमारतींनी आपल्या कार्यालायंची तांक हाचो अभ्यास करिनासतना पार्कींग सुवात दवरूंक ना. खूपश्या पयलींच्या इमारतींनी पार्कींग सुविधाच ना. कांय इमारतींनी आसात पूण त्यो फक्त चार-पांच गाडयो उब्यो करपाक मेळटा इतल्योच आसात. देखून जे सरकारी आनी खाजगी कर्मचारी ह्या इमारतींनी कामाक येतात तांकांच भितर पार्कींग मेळना देखून भायरच पार्कींग करपा बगर दुसरो पर्याय ना.

जाल्यार आतां ज्यो नव्यो इमारती आसात तांणी पार्किंगेची वेवस्था इमारती भितर केल्या. पूण हे पार्कींग सुविधेक लेगीत अाडवाद आसात. इमारतीतल्याे कचेरी आनी आस्थापन धनयांकच ह्या इमारतीच्या वाठारांत आनी अंडरग्रावड पार्किंगेंत सुवात आरक्षीत जाल्या. जर कोण भायलो लोक हे इमारतींत कामा निमतान येता आनी इमारती भितर गाडी लायता जाल्यार तांकां इमारतीचे सुरक्षा रक्षक दंड दितात. ते भायर एक कचेरे फाटल्यान एक चारचाकी आनी एक दुचाकी पार्कींग निश्चीत जाल्या. जर एका कचेरेंत धा कर्मचारी कामार आसात जाल्यार उरिल्ल्या णव कर्मचाऱ्यांक आपली गाडी रस्त्यार लावचीच पडटा.

पार्किंगेचो शुल्क वाडोवपाचेर विचार

पाट्यार सद्या दोन तारांकीत हॉटेलां सयत कॅसिनो चालू जाला. तशेंच ह्या वाठारांत रोखडेंच मॉल येवपाचें आसा. देखून पाट्याचो वालोर बरोच वाडपाचाे आसा. ह्या कारणांक लागून पर्यटकांची संख्या ह्या वाठारांत वाडटली अशी आस्त दवरून पणजी म्हानगरपालिकेन पार्किंगेचें शुल्क वाडोवपाचो विचार चलयला. जर पार्कींग शुल्क वाडयलें जाल्यार दीसावड्यार कामाक येवपी लोकांचेर भरपूर परिणाम जातलो. सद्या पाट्यार चारचाकी खातीर एक वराक रु. 20 घेतात आनी एक वर जाले उपरांत दर वराक रु. 15 घेतात. जाल्यार दुचाकी खातीर चार वरां खातीर रु. 4 घेतात आनी 4 वरां उपरांत पार्क करून दवरल्यार दर वरां खातीर रु. 8 आनी 12 वरां परस चड वेळ दुचाकी पार्क करून दवरल्यार दर वरा खातीर रु. 15 इतलें शुल्क घेतात.

इमारतीच्या बांदकामांक लागून रस्त्यार चिखलाचे लोट

पाट्यार रुआ दे ओवरे ह्या पुला लागसार रिझर्व बँक ऑफ इंडियाचें बांदकाम चल्लां. सद्या ह्या इमारीतीचें बुन्याद मारपाचें काम चालू आसा. पूण नेमाक आडनदर करून आडबडीत बुन्याद मारपाचें काम चालू आसा. हे इमारतीची सुवात खारजांक 100 मिटर तेंकून आशिल्ल्यान बुन्याद मारतना चिखलाचे लोट भायर सरतात.

सद्या व्हड तांकीची मशिनरी वापरून बुन्याद घालपाचें काम चालू आसा. पूण ह्या मशिनांतल्यान भायर सरपी चिखलाचें कसलेंच नियोजन ना. देखून हो सामको दाट चिखल पुराय रस्त्यार येता आनी 100 मिटर मुखार व्हांवून वता. देखून रुआ दे ओवरे ते पोस्ट कार्यालया मेरेन हो चिखल व्हांवून वता. हो चिखल आडावन दवरपा खातीर वा दुसरे कडेन व्हरपा खातीर कंत्राटदारान कसलेंच नियोजन करूंक ना.

मनशांचे पांय बुडटात इतलो रेबो सद्या रस्त्यार जाला. हो रेबो नितळ लेगीत करूंक ना देखून खूबशे दुचाकी चलोवप्यांनी निसरून ह्या चिखलांत लोळन घेतलां. ह्या प्रकल्पांक लागून पाट्याचो चिखल कालो जावन रावला.

दोन दीस पयलीं एकाच दिसा 12 दुचाकी ह्या चिखलांत निसरून तांचो अपघात जाल्लो. उपरांत हे घडणुकेची दखल घेत उजो पालोवपी दळ थंय आयले आनी परिस्थिती नियंत्रणांत हाडपाचो यत्न केलो. उदक मारून चिखल निवळ केलो आनी रस्त्यार बॅरिकेड घातलीं. पूण ह्या घाळपणांक लागून अजून कंत्राटदाराचेर कसलीच कारवाय जांवक ना.