भांगरभूंय | प्रतिनिधी
बेतोडें पंचायतीक लोकांची चार दिसांची मुजत
भांगरभूंय । प्रतिनिधी
फोंडें : प्रस्तावीत आयआयटी प्रकल्पाक अख्ख्या गांवाचो विरोध आसा. अशे परिस्थितींत पंचायतीन लोकां वांगडा रावपाक जाय. पूण अजून मेरेन पंचायत मात तळ्यांत- मळ्यांत भुमिका घेता. चार दिसां भितर आयआयटी विशयाचेर ग्रामसभा जाली ना जाल्यार पंचायत कार्यालया मुखार बसका मारून आंदोलन करतले, अशी शिटकावणी ज्ञानेश्वर खांडेपारकार हांणी दिल्या. सगल्या लोकां वतीन श्रीदेव लंगडेश्वराक बुधवारा गाराणें घातले उपरांत ते उलयताले.
आयआयटी खातीर जांणी कोणा यत्न केल्यात, त्या सगल्यांक सुबुद्धी दिवपाची मागणी देवा कडेन केली. तशेंच गांवांतलो एकवट निमाणे मेरेन तिगून उरचो, अशेंय देवा कडेन मागलें.
खांडेपारकार हांणी सांगलें, हो प्रकल्प कोणाकूच नाका. पूण थळावे सरपंच घडयो राजकी फुढाऱ्यांच्या चेपणा खाला आयल्यात. आयआयटी संबंदांत तांणी आपली भुमिका स्पश्ट करपाक जाय. नाजाल्यार ताका गांवच्या लोकांचे तिडकीक फुडो करचो पडटलो. गांवांतल्या सुमार 800 सयांचें निवेदन पंचायतीक सादर केलां. तातूंत आयआयटी विशयाचेर खास ग्रामसभा घेवपाची विनवणी केल्या. पंचायतीच्या सचिवान हे संबंदांत आपले सोपस्कार पुराय केल्यात. मात मेळिल्ले म्हायती प्रमाण सरपंच मात ते ग्रामसभा नोटिशीचेर सय करपाक वेळ मारून व्हरता. आयतारा 28 सप्टेंबराक ग्रामसभा जाली ना जाल्यार पयलीं सरपंचाच्या घरा आंदोलन करतले आनी उपरांत पंचायत कार्यालया मुखार व्हड आंदोलन उबे करतले. देवेंद्र च्यारी हांणी सांगलें, खास ग्रामसभा घेवची हे संबंदांत हालींच घेतिल्ले बसकेंत निर्णय घेतला. एक गांवचो मतदार म्हूण आपूण हे बसकेक हाजीर राविल्लो. सरपंचाचेर चेपण आसा जाल्यार ताणें उपसरपंच वा हेर पंचाचे अध्यक्षते खाला ही ग्रामसभा घेवची. ताचेर कोणे चेपण हाडलां, तें लेगीत सरपंचान सांगपाचो वेळ आयला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
