भांगरभूंय | प्रतिनिधी
वास्को: सांकवाळ सरपंचपदार अनुषा लमाणी हांची विरोधाविणें निवड जाली. नितळसाण, भलायकी, उदरगत ह्या गजालींक प्राधान्य दितले अशें तांणी सांगलें. ह्या वेळार हजर आशिल्ल्या हेर पंचांनी आनी कांय ग्रामस्थांनी फुलांचो हार घालून तांकां परबीं भेटयलीं.
सांकवाळचे इकरा पंचायत वांगडी आसात. हें सरपंच पद बायलां खातीर राखीव आसात. ह्यान पयलीं सरपंच पदार रोहिणी तोरस्कर आशिल्ली. तांणी कांय कारणाक लागून सुमार दोन म्हयन्यां पयलीं राजीनामो दिल्लो. हाका लागून कारभार उपसरपंच वालिस हे प्रभारी सरपंच म्हणून काम सांबाळटाले. रित्या जाल्ल्या सरपंच पदार नवो सरपंच निवडपाक बुधवारा वेंचणूक जाली. सरपंच पदा खातीर अनुषा लमाणी हिचो एकूच अर्ज आयिल्ल्यान तिची ह्या पदार विरोधाविणें निवड जाली.
सगल्या वांगड्यांच्या सहकार्यान पंचायतीचो कारभार चलोवपाचें आस्वासन तिणें ह्या वेळार दिलें. थळाव्या मुळाव्या सुविधांनी आनीक सुदारणा करप, नागरी सुविधांनी वाड करप, ग्रामस्थांच्या बर्या खातीर योग्य निर्णय घेवप, पंचायत मळार नितळसाण दवरप, उदरगतीचीं कामां चालीक लावपाचें आपूण वचन दितां अशें लमाणी हांणी सांगलें.
रोहिणी तोरस्कर हांणी राजीनामो दिले उपरांत बरोच काळ हें पद रितें आशिल्ल्यान कांय समाजीक कार्यकर्त्यांनी हे विशीं आवाज काडिल्लो. आतां वेंचणूक जावन हो प्रस्न सुटलो
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
