भांगरभूंय | प्रतिनिधी
पणजी : राज्यांत मान्सून पावसान आयज हंगामांतली सरासरी पूर्ण केली. हवामान खात्या वतीन 1 जून ते 30 सप्टेंबरच्या पावसाक हंगामी पावस म्हणटात. राज्यांत हरशी हंगामी पावसाची सरासरी 118.42 इंच इतली आसता. अंदूं 1 जून ते 24 सप्टेंबर मजगतीं सरासरी 118.74 इंच पावसाची नोंद जाल्या. अंदूं स दिसां पयलींच हंगामी सरासरी पुराय जाल्या. अंदूं पावसाचें प्रमाण 2.1 टक्क्यांनी चड आसा.
बंगालच्या उपसागरात निर्माण जाल्ल्या उण्या दाबाचो पट्टो आनी हेर कारणांक लागून राज्यांत 25 ते 30 सप्टेंबर मजगतीं मध्यम स्वरूपाच्या पावसाची शक्यताय आसा. ह्या पांच दिसां खातीर हवामान खात्यान पावसाचो येलो अलर्ट जारी केला. बुधवारा राज्यांत पावसाच्या किरकोळ सरींची नोंद जाली. चोवीस वरांत राज्यांत 8 मिमी पावसाची नोंद जाली.
1 जून ते 24 सप्टेंबर मजगतीं सांग्यार 156.55 इंच, धारबांदोड्यां 155.40 इंच, वाळपय 153.83 इंच, केपें 143.95 इंच, फोंड्यां 127.06 इंच पावसाची नोंद जाली.
फुडले स दीस राज्यांतलो चडांत चड तापमान 28 ते 29 अंश जाल्यार उण्यात उणो तापमान 24 अंश सेल्सिअस मजगतीं उरपाची शक्यताय आसा. राज्यांत 25 ते 28 सप्टेंबर मजगतीं वार्याचो वेग वराक 40 ते 65 किमी पावपाची शक्यताय आसा. हाका लागून वयल्या काळांत नुस्तेंमार्यांनी दर्यांत वच्चें न्हय असो उलो हवामान खात्यान मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
