भांगरभूंय | प्रतिनिधी
डिसेंबर सावन लोकायुक्तपद रितें
पणजी : लोकायुक्तांचे नेमणुके विशीं सरकारान खंयचीं पावलां उबारल्यांत, हे विशींचो अहवाल सादर करपाचे निर्देश गोंयच्या मुंंबई उच्च न्यायालयान दिल्यात. ट्रॉजन डिमेलो हांचे याचिकेचेर 13 ऑक्टोबराक फुडली सुनावणी जातली. तो मेरेन सरकाराक अहवाल सादर करचो पडटलो.
निवृत्त न्यायाधीश अंबादास जोशी हांचो कार्यकाळ सोंपले उपरांत राज्याचे लोकायुक्तपद रितें आसा. डिसेंबर 2024 वर्सा अंबादास जोशी हांचो कार्यकाळ सोंपिल्लो. सुमार 9 म्हयने लोकायुक्तपद रितें आशिल्ल्यान भ्रश्टाचार संबंदीचे याचिकेचेर सुनावण्यो ठप्प जाल्यात. बेगोबेग लोकायुक्त नियुक्तीचे आदेश उच्च न्यायालयान सरकाराक दिवचे, अशी मागणी करपी याचिका ट्रॉजन डिमेलो हांणी दाखल केल्या. ही याचिका आयज बुधवारा उच्च न्यायालयांत सुनावणेक आयली तेन्ना लोकायुक्तांचे नेमणुकेची प्रक्रीया सुरू आशिल्ल्याचें सरकारा वतीन सांगलें. लोकायुक्तांच्या नेमणुके विशीं सुरू आशिल्ल्या हालचालीं विशीं फुडले सुनावणे वेळार अहवाल सादर करचो, अशे निर्देश उच्च न्यायालयान सरकाराक दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
