भांगरभूंय | प्रतिनिधी
मडगांव: कोकण रेल्वेंतल्या चोरयेच्या जायत्या गुन्यांवांनी दुबावीत आशिल्लो सेशांत उर्फ शिरशा राठोड (29, रा. मुरगांव) हाचो अटकपूर्व जामीन अर्ज दक्षीण गोंय जिल्लो सत्र न्यायालयान भायर मारला. अर्जदारान खंयच्या गुन्यांवांत अटकेची शक्यताय आसा, हें स्पश्ट करूंक नाशिल्ल्यान न्यायालयीन प्रक्रियेंत दुबाव निर्माण जाल्ल्याचें निरीक्षण नोंद करीत न्यायालयान हो निर्णय दिला.
ह्या प्रकरणाचे सुनावणे वेळार कोकण रेल्वे पुलिसांनी न्यायालयांत सांगलें, दुबावीत सेशांताचेर 16 एप्रील दिसा एक गुन्यांव नोंद आसा. ह्या गुन्यांवा प्रमाण,15 मार्चाक नेत्रावती एक्स्प्रेसींतल्यान प्रवास करपी उषा सजावण हे बायलेचें 12 ग्रॅमचें मंगळसूत्र आनी 1.2 लाख रुपयांचें सामान चोरी जाल्लें. ह्या प्रकरणांत दुबाविताक अटक करून न्यायालयीन बंदखण आयकयल्ली. तांणी विकिल्ल्यो भांगराच्यो वस्ती सोनारान विरघळयिल्ल्योच जप्त केल्यात. हाका लागून संबंदीत सोनाराक नोटीसूय धाडल्या.
हे विशीं पुलिसांनी सांगलें, दुबावीत सेशांता आड वट्ट चार गुन्यांव नोंद आसात आनी ताका सगल्या गुन्यांवांनी जामीन मेळ्ळा. हें सगलें मतींत घेवन न्यायालयान म्हणलें, अर्जदारान खंयच्या प्रकरणांत अटक जावपाची शक्यताय आसा हाची म्हायती दिवंक ना. अशे परिस्थितींत, ताका अटकपूर्व जामीन मंजूर करप शक्य ना, कारण ताचे आड फुडाराक दाखल जावपी गुन्यांवांचे चवकशे खातीर ताची हाजेरी गरजेची आसपाक शकता. हाका लागून न्यायालयान हो अर्ज मंजूर करूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
