भांगरभूंय | प्रतिनिधी
केपें: कुडचड्यां वाठारांत फाटल्या कांय दिसां सावन ट्रकांच्यो बॅटरी चोरपाच्यो घडणुको घडटात. काल रातीं ह्या वाठारांत एक भिरांकूळ घडणूक घडली. काकोड्यां एका अनवळखी मनशान मध्यान राती दोन चारचाकी आनी एके दुचाकीक उजो लायलो. हातूंत व्हड लुकसाण जालां. लोकां मदीं भंय पातळ्ळा.
ही घडणूक मध्यानराती सुमार २ ते ३ वरां मदीं घडली. घराचे कुशीकूच उब्यो करून दवरिल्ले एके नवे मारुती वॅगन गाडयेक तशेंच गॅरेजींत कामा खातीर आशिल्ले मारुती सियाझ हे चारचाकीक उजो लायलो. तांचे वांगडा एके दुचाकीकूय उजो लायलो. ह्या उज्यांत गाडयो पुरायेन लासून गोबर जाल्यो. मारुती सियाझ गाडयेचें कांय प्रमाणांत लुकसाण जालें. कांय लोकांच्या मतान, अनवळखी मनशान डिझेल वापरून ह्या वाहनांक उजो लायलो.
फाटल्या कितल्याशाच दिसां सावन कुडचडें, सांवड्डें, तिस्क आनी धडे वाठारांत रस्त्या कुशीक पार्क करून दवरिल्ल्यो ट्रकांच्यो बॅटरी चोरी जाल्ल्यो. त्यो कोणी चोरल्यो हें आजूनय समजूंक ना. तातूंतच आतां वाहनांक उजो लायिल्ल्यान नागरिकांनी तिडक उक्तायल्या.
थळाव्या लोकांनी हे घडणुकेची कागाळ कुडचडें पुलीस स्टेशनांत दाखल केल्या. हे विशीं पुलिसांनी बेगोबेग तपास करून दुबाविताक अटक करपाची मागणी लोकांनी केल्या
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
