भांगरभूंय | प्रतिनिधी
पणजी : भाजप पक्षांतल्या सगल्यांनी जापसालदारकेन वागप आनी विधान करप गरजेचें. केन्नाय कोणेंय चुकीचें विधान केल्यार ताका दुसरो मनीस परती जाप दिता. मंत्री रमेश तवडकार आनी आमदार गोविंद गावडे हे दोगूय गोंयां खातीर काम करतात. एका पक्षांत तू तू मैं मैं जाल्यार ताचें व्हडलें करचें न्हय. जंय मोग आसता थंय रागूय आसता. हांव दोगांकडेनूचय उलयलां, तांचे मदीं आतां कांयच वाद ना, अशें भाजप प्रदेशाध्यक्ष दामू नायक हांणी सांगलें.
सध्या गोंयच्या राजकरणांत भुरगेपणां करप सुरू आसा. रामा काणकोणकार मारपेट प्रकरणांत पणजे मोर्चा काडला. ह्या वेळार आमदार व्हेंजी व्हिएगस हांणी कारण नासतना भाजप कार्यालयाक लक्ष्य केलें. तेन्ना आमच्या कार्यालयांत बायलो आशिल्ल्यो. तांणी भियेवन दारां बंद करून घेतलीं. आंदोलकांनी थंय वचून घोशणा केली, दारां बडयलीं. व्हेंजी हांणी आपूण एक लोकप्रतिनिधी आसा हाचें तरी भान राखपाची गरज आशिल्ली. आमचे मदीं कितली तांक आसा हें आमी दाखोवपाक शकता, मात आमी गुंडगिरी करिनात, अशें दामू नायक हांणी सांगलें.
हे विशीं भारतीय जनता युवा मोर्चान घेतिल्लो सोपूत योग्यूच आसा. मुळांत रामा काणकोणकार हल्लो प्रकरण आनी भाजप कार्यालय हांचो संबंद कितें आसा, ह्या हल्ल्या प्रकरणांत आमी पयलींच निशेध केला. पुलिसांनी बेगोबेग कारवाय करीत खुबश्या जाणांक अटक केल्या. अशें आसतना आमचें कार्यालय आशिल्ले इमारतींत येवपाचो प्रस्न येना. आंदोलक आमच्या कार्यालया लागसार आयिल्ल्याचे व्हिडियो आसात. व्हेंजी हांकां राजकारण करपाचें आसल्यार आमीय राजकारण करतले, अशें तांणी म्हणलें.
व्हिडीओवरवीं नांव पेड्ड्यार करपाचो यत्न
सध्या एक व्हिडिओ व्हायरल करून म्हजें नांव पिड्ड्यार करपाचो यत्न चालू आसा. हातूंत हांव एका गुन्यांवकारी मनशा वांगडा आशिल्ल्याचें सांगतात. हो व्हिडियो म्हज्या वाडदिसाचो. त्या दिसा म्हाका हजारांनी लोकांनी परबीं भेटयिल्लीं. हांवें कोणाकूच न्हयकार दिवंक ना. व्हिडियोंतलो मनीस आनी म्हजो कसलोच संबंद ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
