भांगरभूंय | प्रतिनिधी
मडगांव: मडगांवच्या कोंकण रेल्वे स्टेशनाचेर भारताच्या स्वातंत्र्य लढ्या विशींचें प्रदर्शन आनी टिका उत्सवाचें उक्तावण कोंकण रेल्वेचे क्षेत्रीय वेवस्थापक बी. बी. निकम हांचे हस्तुकीं जालें.
ह्या वेळार कोंकण रेल्वेचे उपसरवेवस्थापक बबन घाटगे, ज्युनियर ट्राफिक वेवस्थापक सुनील नारकर, स्टेशन मास्तर प्रशांत गाड, कोंकण रेल्वेचे भलायकी अधिकारी डॉ. विनोद कानतोडे, सेंट्रल ब्युरो ऑफ कम्युनिकेशनाचे रियाज बाबू हाजीर आसले.
आझादी का अमृत महोत्सवाच्या निमतान हें तीन दिसांचें फोटो प्रदर्शन आयोजीत केलां. भारताच्या स्वातंत्र्य लढ्याची म्हायती फोट्यांच्या माध्यमांतल्यान दिल्या. हातूंत सुमार 1 लाखा परस चड चित्रां आसात.
हें प्रदर्शन सेंट्रल ब्युरो ऑफ कम्युनिकेशन, गोंय हांच्या जोड पालवान आयोजीत केलां. हातूंत 1931 वर्साची दुसरी गोलमेज परिशद, नेताजी सुभाषचंद्र बोस हांचें 1921 ते 1945 मजगतचें योगदान, आझाद हिंद सेनेची स्थापणूक, 1930 वर्साची दांडी यात्रा, शिमला परिशद, सरदार वल्लभभाई पटेल हांचें योगदान, स्वातंत्र्य सैनिकांची म्हायती, 1921 असहकार चळवळ, जालियनवाला बाग हत्याकांड, लोकमान्य टिळकांचें योगदान अश्या कितल्याश्याच घडणुकांची उपेगी म्हायती दिल्या. ह्या प्रदर्शना वांगडाच कोविडाचे तीन दिसांचें लसीकरण केंद्र सुरू केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
