भांगरभूंय | प्रतिनिधी
पणजी : हांव मंत्री जावचे पयलीं खंयच्या खात्यान, खंयच्या कारणा खातीर परवानगी नासतना रस्ते खणिल्लें, हे विशीं हांव उलोवचो ना. मात खणपाच्या कामाक लागून रस्त्यांची वाट लागल्या, हें खरें. ह्यान फुडें रस्ते खणपा खातीर बांदकाम खात्याच्या (पीडब्ल्युडी) प्रधान मुख्य अभियंत्यांची परवानगी आसप गरजेचें केलां. परवानगी नासतना रस्ते खणल्यार खर कारवाय करतले, अशी शिटकावणी बांदकाम मंत्री दिगंबर कामत हांणी दिली.
मंत्री म्हणून रस्ते बरे करप ही म्हजी जापसालदारकी. खात्यांतल्या अभियंत्यांनी म्हाका मतदासंघा प्रमाण पिड्ड्यार जाल्ल्या रस्त्यांची वळेरी दिली. हातूंत रस्त्यांचे स्थिती प्रमाण वर्गवारी केल्या. राज्यांत सामके पिड्ड्यार जाल्ले रस्ते खूबच उणे आसात. हे विशीं बेगीनूच काम सुरू करतले. राज्यांत सध्या खूब पावस आशिल्ल्यान हॉट मिक्सिंग प्लॅन्ट बंद आसा. रस्ते दुरुस्ती काम सुरू जावंक ना. मात गरजेच्या सुवातांचेर पॅच वर्क करपाचें काम चलता, अशें कामत हांणी म्हणलें.
एकदां रस्त्यांचें हॉटमिक्सींग जालें काय जमनी पोंदच्यान वीज, घाणयार्या उदकाच्यो सरयो घालपा खातीर वा हेर खंयच्याय कारणा खातीर रस्तो खणपाचो आसल्यार प्रधान मुखेल अभियंत्यांची परवानगी घेवची पडटली. हेर खंयच्याय अधिकार्याचे परवानगेन रस्तो खणपाक मेळचो ना. पर्वरी ते साळगांव रस्त्यार पॅच वर्क काम सुरू जालां. कांय सुवातांचेर रस्ते रुंदीकरणाच्या वेळार झाडां काडपाची गरज आसता. शक्य आसा ते सुवातेर पोरणी झाडां काडून तीं हेर कडेन लावपाचो आमी यत्न करतात, अशें तांणी सांगलें.
कला अकादमी अहवाल मेळूंक ना
कला अकादमीच्या कामा विशींचो अहवाल आजूनय म्हाका मेळूंक ना. सकाळीं म्हाका उदका खेळ संघटणेचे वांगडी मेळपाक आयिल्ले. तांच्यो कांय समस्या आशिल्ल्यो. ते विशीं बंदर कप्तानांक म्हायती दिल्या, अशें कामत हांणी म्हणलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
