भांगरभूंय | प्रतिनिधी
नवी दिल्ली, खबरां संस्था: अफगाणिस्तानांतल्या एका १३ वर्सां पिरायेच्या भुरग्यान विमानाच्या लँडिंग गियरांत लिपून भारतांत प्रवेश केलो. ही घडणूक आयतार, २१ सप्टेंबराक घडली.
अफगाणिस्तानाच्या केएएम एअरलायन्सचें विमान आरक्यू-४४०१ हें काबूलच्या हमीद करझाई विमानतळावेल्यान सकाळीं ८:४६ वरांचेर भायर सरलें आनी दिल्लीच्या इंदिरा गांधी आंतरराष्ट्रीय विमानतळाच्या टर्मिनल ३चेर सकाळीं १०:२० वरांचेर देंवलें.
विमान कर्मचार्यांक विमाना लागसार एक भुरगो भोंवतना दिसलो. तांणी हे विशीं रोखडेंच अधिकार्यांक कळयलें. उपरांत सीआयएसएफान त्या भुरग्याक ताब्यांत घेतलो आनी पुलिसांचे सुवादीन केलो.
अफगाणिस्तानांतल्या कुंडुझ हांगच्या ह्या भुरग्यान अधिकार्यांक सांगलें, ताणें हें अशें केल्यार कशें दिसता हें पळोवपा खातीर केलें.
सोमारा अधिकार्यांनी सांगलें, भुरगो काबूल विमानतळार ल्हवूच घुसलो आनी विमानाच्या फाटल्या लँडिंग गियराच्या डब्यांत वचपाक येसस्वी जालो. पुराय तपासणे उपरांत विमान सुरक्षीत आशिल्ल्याचें सांगलें. त्याच दिसा त्याच विमानान त्या भुरग्याक अफगाणिस्तानाक परत धाडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
