भांगरभूंय | प्रतिनिधी
पणजी : पणजे शाळां लागसार सिगरेटींची विक्री करपी पसऱ्यांचेर कोटपा कायद्या खाला कारवाय करून कोटपा कलम 6 (अ)चें उल्लंघन केल्ल्या कारणान तशेंच चुकीची म्हायती दिवपी तकटे लायिल्ल्यान तिसवाडी म्हालांतल्या कोटपा अंमलबजावणी पंगडान विकपाक दवरिल्ल्यो सिगरेटी जप्त केल्यो.
तिसवाडीचे मामलेदार दत्तप्रसाद तोरसकार हांच्या फुडारपणा खाला पणजी शारांत अंमलबजावणी पंगडान ही कारवाय केल्या.
भुसारी दुकान, सोऱ्याचें दुकान, फास्ट फुडाचे गाडे, बार आनी रेस्टॉरेंट हांचे कडेन नो स्मोकींग सुचोवणी तकटे लावंक नाशिल्ल्यान कोटपाच्या कलम 4 खाला तांकां 12 चलन दिवन 2400 रुपयांचो दंड दिलो. जाल्यार प्रॉग्रेस हायस्कूल आनी कस्तुरबा मातोश्री हायस्कुलच्या वाठाराच्या 100 यार्डा भितर एक सिगरेटी विकपी पसरो दिसून आयलो. पंगडान ह्या पसऱ्यांतल्यान सिगरेटी जप्त करून कलम 6अ खाला दंड दिलो. ह्या पसऱ्या आड योग्य ती कारवाय करची अशें पत्र मामलेदार, पणजी महानगरपालिकेचे आयुक्त आनी जिल्होधिकाऱ्याक बरयतले. जोड मामलेदार अभिजीत गांवकार, गोवा कॅन एनजीओचे रोलन्ड मार्टीन्स, पणजी भलायकी केंद्राचे डॉ. योगेश पालकार, कर निरिक्षक सुहानी भोसले, तलाठी केदार भंडारी आनी पणजी पुलीस स्टेशनाचे कॉन्स्टेबल दीपक सावंत आनी लक्ष्मण म्हामल हे पंगडाचे वांगडी आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
