भांगरभूंय | प्रतिनिधी
मडगांव : माजोड्ड्यां सोमारा सकाळीं बेकायदेशीरपणान आयोजीत केल्ल्या धिरयां मजगतीं रेड्यान राजेश निसातानी (रा. चांदर) हाका जखमी केलो. उपचारा मजगतीं ताका मरण आयिल्ल्याची घडणूक घडल्या. आनीक चार जाण जखमी जाल्यात. कोलवा पुलिसांनी ह्या प्रकरणांत गुन्यांव नोंद केला. राज्य सरकारा वतीन धिरयांचेर कारवाये खातीर बंदी घालूनय सुरू आशिल्ल्या ह्या धिरयांक लागून सरकाराकूच आव्हान दिवपाचो प्रकार सध्या घडटा.
दक्षीण गोंय जिल्लो प्रशासनान धिरयो बंद करपाक उपाय केल्यात. विवीध उपाय, कायदे आनी म्हाल पांवड्यावेल्या समित्यांचे निर्मिती उपरांतूय जनावरांच्या बेकायदो झुंजीच्या प्रकाराचेर बंदी येना. ह्यान पयलीं शेनवारा कोलवाच्या उक्त्या मैदानार बैलाचे झुजीचें आयोजन केल्लें. त्या धिरयांचो व्हिडियो सोशल मिडियाचेर व्हायरल जाले उपरांत कोलवा पुलिसांनी दोन अनवळखी मनशां आड प्राणी क्रुरताय प्रतिबंधक कायद्यां खाला गुन्यांव दाखल केल्लो.
राज्यांत जनावरांचे झुजीचेर पुरायेन बंदी घालपा खातीर सरकार आनी प्रशासन सेगीत यत्न करता. दक्षीण गोंयच्या जिल्लोधिकार्यांनी ‘धिरयो’ आडावपाक म्हाल पांवड्यार टास्क फोर्स समित्यांची स्थापना केल्या. अश्यो घडणुको प्रभावीपणान हाताळपाक मेळचे खातीर ह्या समित्यांक हालींच प्रशिक्षणूय दिलां. धिरयांच्या आयोजनाक आळो घालपाक सरकारान जनावरांक मायक्रोपीप बसोवप सक्तीचें केलां. नेमो मोडप्यांक ५० हजारांचो दंड जातलो. आतां दोन दिसांनी दुसरे फावट धिरयांचें आयोजन केल्ल्यान सरकाराच्या आनी पुलिसांचे कारवाये विशीं दुबाव निर्माण जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
