भांगरभूंय | प्रतिनिधी
हवालदार शैलेश गोवेकार हांचो पालकांक उलो
ठाणे सत्तरीच्या सरकारी माध्यमीक विद्यालयांत रस्तो सुरक्षा सप्तक
भांगरभूंय । प्रतिनिधी
वाळपय : शाळेंत वचपी भुरगीं हीं पिरायेन ल्हान आसतात. उणे पिरायेच्या भुरग्यां मदीं गाडी चलोवपाची खुबूच उमेद आसता. पूण तांणी 18 वर्सां पुराय जायं मेरेन थार धरपाक जाय. उपरांत गाडी चलोवपाचो परवानो घेवन येरादारी नेम पाळून जतनायेन गाडी चलोवपाक जाय. ना जाल्यार ल्हान पिरायेंत ‘उडने की आशा’ भुजपाक शकता. स्वताक आनी निश्पाप लोकांक अडचणींत घालपाक शकता. शाळेंत शिकपी भुरग्यांनी आपल्या पालकांक रस्तो सुरक्षा आनी येरादारीचे नेम पाळपा खातीर सक्ती करपाक जाय. तेचवरी परवानो नासल्यार भुरग्यांक गाडी दीवं नाका, अशें दिवचल येरादारी विभागाचे हेडकॉन्स्टेबल शैलेश गोवेकार हांणी सांगलें.
ठाणे सत्तरीच्या पी. एम. बी. बा. देसाय सरकारी माध्यमीक विद्यालयांत राष्ट्रीय सस्तो सुरक्षा सप्तक मुख्याध्यापक काशिनाथ नायक हांच्या मार्गदर्शना खाला मनयलें. तातूंत मुखेल मार्गदर्शक म्हूण गोवेकार उलयताले.
गोवेकार हांणी यत्ता आठवी, णववी आनी धावीच्या विद्यार्थ्यांक रस्तो सुरक्षा आनी येरादारीचे नेम, नेम मोडल्यार कसल्या परिणामाक फुडो करचो पडटा, ताच्यो देखी दिवन येरादारी विशींच्या नेमांची जाणीव करून दिली.
काशिनाथ नायक हांणी प्रास्तावीक करून येवकार दिलो. शालेय विद्यार्थ्यांची गाडी चलोवपाची उमळशीक आनी पालक तांकां परवानगी दिता, हे खातीर तांणी खंत उक्तायली. शालेय विद्यार्थ्यांक लागून खूबशे अपघात जातात. शालेय विद्यार्थी आनी पालकां मदीं जागरुकता निर्माण करचे खातीर रस्तो सुरक्षा सप्तक मनोवप कित्याक गरजेचें आसा, हें तांणी समजावन सांगलें. विद्यार्थी रोहीत वाडकार हांणी सगल्या विद्यार्थ्यांक तशेंच शिक्षक वर्गाक रस्तो सुरक्षेचो सोपूत दिलो. विद्यालयाच्या येरादारी विभाग समितीचे मुख्य शिक्षक दामोदर गांवकार हांणी उपकार मानले. ही कार्यावळ येसस्वी करचे खातीर ज्येश्ठ शिक्षिका मिनाक्षी गांवस, शिक्षक अक्षय सावंत, दामोदर गांवकार, रक्षंदा काणेकार आनी प्रीतम कुलकर्णी हांचो विशेश आदार मेळ्ळो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
