देशाचे उदरगतीक काँग्रेसीचो खो

भांगरभूंय | प्रतिनिधी

दामू नायक : नशामुक्ती खातीर तरणाट्यांनी मुखार सरचें

‘नशामुक्त भारत नमो रनां’त 3300 लोकांचो वांटो

भांगरभूंय । प्रतिनिधी

दिवचल : प्रधानमंत्री नरेंद्र मोदी हांच्या सक्षम फुडारपणा खाला फाटल्या 10 वर्सांत भारत वैभवाचे तेंगशेर पावला. अशें आसतना देशांतले काँग्रेसीचे लोक भाजपान चलयल्ल्या कल्याणकारी आनी देशहिताच्या यत्नांक खो घालपाचो यत्न करता आनी फटीचे आरोप करून वीख पातळयतात. शेजारच्या देशांक लेगीत उदरगत पळोवपाक जायना. अशे परिस्थितींत तरणाट्यांनी नशामुक्तीचो ध्यास घेवन नशामुक्त भारत करचे खातीर फुडाकार घेवप गरजेचें आसा, अशें भाजप प्रदेशाध्यक्ष दामू नायक हांणी सांगलें. भाजप युवा मोर्चा वतीन दिवचले व्हाळशेंत नशामुक्त भारत खाला ननो रनचें विवीध गटांत आयोजन केल्लें. हाचें खाशेलपण म्हणल्यार सुमार 300 चल्या चलयांनी तशेंच नागरीक, ज्येश्ठ नागरीक, दादले, बायलांनी तातूंत वांटो घेतलो.

तरणाट्यांनी देशाच्या फुडारा खातीर आपलें योगदान दिवपाची गरज आसा. ह्याच उद्देशान प्रधानमंत्री नरेंद्र मोदी हांच्या वाडदिसा निमतान नशामुक्त भारत नमो हाच्या माध्यमांतल्यान सगळ्या तरणाट्यांक संघटीत करपा खातीर नमो रनचें आयोजन केलां, अशें प्रदेश भाजपा अध्यक्ष दामू नायक हांणी स्पश्ट केलें.

ह्या वेळार माचयेर राज्यसभा खासदार सदानंद तानावडे, आदले खासदार नरेंद्र सावयकार, दिवचलचे आमदार डॉ. चंद्रकांत शेट्ये, मयेंचे आमदार प्रेमेंद्र शेट, उत्तर गोंय भाजप अध्यक्ष दयानंद कारबोटकार, युवा अध्यक्ष तुषार केळकार, भाजपचे फुडारी सिद्धार्थ कुंकळकार, समीर मांद्रेंकार, दीपक नायक, सर्वानंद भगत, राष्ट्रीय युवा फुडारी अर्पिता, अनिकेत चणेकार हाजीर आशिल्ले.

सदानंद तानावडे हांणी सांगलें, नशामुक्त भारत नमोच्या माध्यमांतल्यान देशांतले युवा आनी सगळ्या सामान्य लोकांक नशे पसून मुक्त करतना आदर्श भारतनातेची सेवा करपाची प्रेरणा दिवपाचो उद्देश आसा. हाका लोकांचो बरो प्रतिसाद मेळ्ळो, ते खातीर भाजप युवा तशेंच आमदार डॉ. शेट्ये आनी आमदार शेट हांकां तांणी विशेश परवीं दिली.

आमदार प्रेमेंद्र शेट हांणी ननो रनांत वांटो घेवन पांच किलोमिटर मेरेन धांवून आपूण तंदुरुस्त आशिल्ल्याचें दाखोवन दिलें. तशेंच एके गुरवार बायलेन हे सर्तींत वांटो गेवन देशप्रेमाची आगळीवेगळी वखळ करून दिली. दिव्यांग, युवा, ज्येश्ठ नागरिकांनी लेगीत ह्या अभियानांत वांटो घेतलो. विद्यार्थी, युवा, ज्येश्ठ नागरीक, चलयो, बायलो अश्या विवीध गटांत 3300 जाणांनी ह्या अभियानांत वांटो घेवन वेगळी स्फूर्त दाखयली. आमदार डॉ. चंद्रकांत शेट्ये हांणी ही सर्त खऱ्या अर्थान येसस्वी जाल्ले खातीर खोस उक्तायली. युवा कार्याकर्त्यांनी घेतिल्ली मेहतन पुराय तरेन फळादीक जाली, अशेंय तांणी सांगलें. देशभर 75 सुवातांचेर सुमार 10 लाख तरणाटे- तरणाट्यो आनी लोकांनी हे सर्तींत वांटो घेवन संवसारीक विक्रम केल्ल्याचेंय ह्या वेळार स्पश्ट केलें.

फांतोडेर 5.30 वरांचेर दामू नायक हांचे हस्तुकीं सर्तीचें उक्तावण केलें. किरण नायक हांणी सुत्रसंचालन केलें जाल्यार तुषार केळकार हांणी उपकार मानले.

सर्तीचो निकाल

नशामुक्त भारत नमो रन सर्तींत अनील बोडके, विजयालक्ष्मी कंगनवार, नंदेश गांवकार, सोनाली कवठणकार, विवेक पांडे, सानिका सुरलीकार हांणी विवीध गटांत पयलें इनाम मेळयलें. 18 ते 35 वर्सां पिराय गटांत दुसरें- हू मेन सेनापती दुसरें, तिसरें- सिद्धेश बारजे, बायलां गटांत अयान सुवरीस, तिसरें- सुनिता कुमारी. 36 ते 60 पिराय गट- दुसरें- पवन कुमार, तिसरें- मोहनदास नार्वेंकार. बायलां गट- दुसरें- श्रीदेवी मंजुनाथ, तिसरें- शिल्पा नायर. 5 ते 17 वर्सां पिराय गट दुसरें सूर्य प्रतापसिंग, तिसरें- प्रथमेश हमपूर. बायलां गट दुसरें- गारवी कळंगूटकार, तिसरें- वैष्णवी गांवस आनी श्रिया नायक. पांच किलोमिटर अंतर धांविल्ले आमदार प्रेमेंद्र शेट हांचो विशेश भोवमान केलो. तशेंच एके गुरवार बायलेन सर्तींत वांटो घेतिल्ले कातीर तिचोय विशेश भोवमान केलो.