भांगरभूंय | प्रतिनिधी
गोविंद गावडे : आदिवासीचे नवे संघटणेचें काणकोणां उक्तावण
भांगरभूंय । प्रतिनिधी
काणकोण : 63 वर्सां काम करपी गोमंतक गौड मराठा समाज संघटणा आनी उठा संघटणांचेर सरकारान बंदी घालून आदिवासींचें खच्चीकरण करपाचो जो यत्न केला ताका जाप मेळटली. उटाचे वाटेक येवप्यांक थंयच्यान उखलतले. 2027 मेरेन आदिवासींक राजकी आरक्षण मेळना जाल्यार ते परांत आमकां खंयच्याच सरकाराची गरज पडची ना. ते उपरांत आरक्षण आपसूक मेळटली, अशें आदले आमदार तशेंच प्रियोळचे आमदार आनी आदिवासींचे फुडारी गोविंद गावडे हांणी सांगलें.
श्रीस्थळ काणकोणां जी एम सेलिब्रेशन सभाघरांत आदिवासींच्या युनायटेड ट्रायबल असोसिएशन (गावडा कुणबी वेळीप) हे नवे संघटणेचें उक्तावण केले उपरांत गावडे उलयताले. ह्या वेळार माचयेर आदले मंत्री प्रकाश वेळीप, आदले सरपंच उमेश उर्फ दया गांवकार, मोलू वेळीप, नवे संघटनेचे अध्यक्ष विश्वास गावडे, मालू वेळीप, जिल्हो पंचायत वांगडी शोभना वेळीप, दुर्गादास गावडे आनी सतीश गांवकार हाजीर आशिल्ले.
आदिवासींक काबार करपाचें काम सध्या चालू आसा. उटा ही संस्था आदिवासींच्या हक्कां खातीर लडटा. हेच खातीर हे संस्थेचेर बंदी घातल्या. बंदी घातल्या म्हूण आमचें काम बंद जावचें ना. ज्या उटाक लागून, ज्या गोमंतक गौड मराठा संघटणेक लागून जांकां वळख मेळ्ळी तेच आयज हे संघटणे कडेन संबंद नाशिल्ल्याचें सांगतात, हें कितलें योग्य आसा, असो प्रस्न उपस्थीत करून गावडे हांणी मंत्री रमेश तवडकार हांचेर खर टिका केली.
गोंय सांबाळपी आदिवासीच्या संघटनांचेर सरकार बंदी घालता, मात न्यायालयांत आमकां न्याय मेळटलो. आदिवासींचेर जावपी अन्याय आमी सोंसून घेवचे नात. कोडार वाठारांत येवपी आयआयटीक विरोध आसा. थंयच्या आदिवासींचेर जावपी अन्याया आड संघटना काम करतली. रामा काणकोणकार हांकां मारपेट प्रकरणाचो गावडे हांणी खर उतरांनी निशेध केलो.
आदींचो उटा फोंड्यां सावन सुरू जाल्लो, आतां नवो उटा काणकोण सावन सुरू जाला. देशभरांत 12 कोटी आदिवासी आसात. घटनेन दिल्ले अधिकार आमी मागतात. ते दिवप म्हणल्यार उपकार न्हय, अशें प्रकाश वेळीप हांणी सांगलें.
आदिवासी व्यक्ती फुडें वतली, ह्या भंयानूच आमच्यांत फूट घालपाचें काम चल्लां, अशें दुर्गादास गावडे हांणी सांगलें.
आदिवासींक गृहीत धरूं नाकात. आदिवासींचेर अन्याय करपाक जे कोण उर्बा दितात, तांकां सोडचे नात, अशी शिटकावणी विश्वास गावडे हांणी दिली. ह्या वेळार नवे संघटणेच्या बॅनराचें लोकार्पण गोविंद गावडे हांचे हस्तुकीं जालें. आनंद गांवकार हांणी सुत्रसंचालन केलें जाल्यार अर्जुन गांवकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
