भांगरभूंय | प्रतिनिधी
पणजी : नवरात्रां फाल्यां, 22 सप्टेंबरच्यान सुरू जातात. देवी दुर्गेन महिशासुर ह्या राक्षसा वांगडा णव दीस झूज करून ताचो वध केल्लो म्हणूनच हो उत्सव आदिशक्तीक, स्त्रीशक्तीक समर्पीत करतात. हाका लागून नवरात्रांच्या ह्या णव दिसांक देवीच्या णव रुपांक लोक भक्तीभावान आनी उमेदीन पुजतात. तशेंच हे णव दीस णव तरेच्या रंगाचे कपडेय घालून लोक हो उत्सव मनयतात. तर अंदूचे हे णव रंग खंयचे तरे पळोवया.
नवरात्रांचे णव रंग
पयलो दीस, 22 सप्टेंबराचो रंग ‘धवो’: हो रंग शांतताय आनी निर्मळतायेचें प्रतीक.
दुसर्या दिसाचो रंग ‘तांबडो’: सौंदर्य, मोग आनी धैर्याचें प्रतीक.
तिसर्या दिसाचो ‘निळो’: रंग समृध्दी आनी बरे भलायकेचो.
चोवथ्या दिसाचो रंग ‘हळदुवो’: जें सुखाचें प्रतीक जावन आसा.
पांचव्या दिसाचो रंग ‘पाचवो’: हो रंग नवीन सुरवात, समृद्धीचें प्रतीक जावन आसा.
सव्या दिसाचो रंग ‘गोबरो’: हो रंग बदल घडोवपाचें प्रतीक मानतात.
सातव्या दिसाचो रंग ‘केसरी’: हो रंग शक्ती आनी उर्जेचें प्रतीक मानतात.
आठव्या दिसाचो रंग ‘मोरपंखी: हो रंग सुपीकताय, सौदर्य आने मोहकतेचें प्रतीक.
निमाण्या णव्या दिसाचो रंग ‘गुलाबी’: हो रंग मोग, आपलेपण, स्त्रीत्वाचें प्रतीक मानतात.
लक्षांत दवरात ह्या णवूय रंगांक कसलेच तरेचें धर्मीक म्हत्व, कारण ना. मात उमेद म्हणून हे रंग गोंय आनी महाराष्ट्रांतलीं बायलां, दादले घालतात आनी ह्या णवूय दिसा तुमी तुमचे काडिल्ले ग्रुप फोटो आमकां धाडपाक शकतात. आमी तुमचे फोटो फेसबूक आनी इन्स्टाग्रामार पोस्ट करतलीं. तशेंच हे फोटो भांगरभूंय दिसाळ्याचेरूय छापून येतले. फोटवा वांगडा कॅप्शन धाडपाक विसरूं नाकात. [email protected] ह्या ई-मेल आयडीचेर तुमी तुमचे फोटो धाडचे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
