भांगरभूंय | प्रतिनिधी
पिल्लई कुटुंबाचो धर्मीक भावना दुखयल्ल्याचो आरोप : दोगां आड गुन्यांव दाखल
पणजी : आयडीसी वेर्णांतल्या एका बांदकाम फर्माच्या कार्यालयांत ६ सप्टेंबराक कांय लोकांनी घुसून तोडफोड केली. तशेंच थंयच्या कांय जाणांक मारपेट केली आनी कार्यालयांतल्या देवांच्या फोटवांचेर थुंकून धर्मीक भावना दुखयल्ल्याचो आरोप आसा. ह्या प्रकरणांत वेर्णा पुलिसांनी दोगां आड गुन्यांव दाखल केला.
हे विशीं पुलिसांनी दिल्ले म्हायती प्रमाण, ६ सप्टेंबराक सांजेवेळार सुमार ४ वरांचेर ही घडणूक घडली. एसजे कन्स्ट्रक्शनाच्या कार्यालयांत घुशिल्ल्या हल्लेकारांनी हारशाची टिपॉय फोडली. कार्यालयाचे धनी श्रीजुकुमार पिल्लई हांकां बडी घेवन मारपेट केली आनी तांच्या बापायकूय मारपेट केली. धुकलून सकयल उडयलो. दुबावितांनी बायल कर्मचार्यांक गाळीं संवून जिवे मारपाचीय धमकी दिली. तशेंच तांणी कार्यालयांतल्या देवळांत दवरिल्ल्या देवी- देवांच्या फोटवांचेर थुकून ह्या कुटुंबाच्यो धर्मीक भावना दुखयल्यात.
ह्या प्रकरणांत पिडेस्त श्रीजुकुमार पिल्लई, (रा. झुआरीनगर) हांणी कागाळ दाखल केली. हे कागाळी प्रमाण पुलिसांनी मुहंमद अली शेख, ताचो जांवय सुहेल शेख आनी हेरां आड विवीध कलमां खाला गुन्यांव नोंद केला. तांणी कांय बायलां बावन्सरांकूय हाडिल्लीं, अशें व्हायरल जाल्ल्या व्हिडियोंत दिसता. आपल्या कामाचे पयशे दिवंक ना, असो दुबावितांचो आरोप. मात काम अर्दकुटें आसा, तें पुराय केल्ल्याचीं बिलां दियात आमी सोमतेच पयशे दितात, अशें पिल्लई कुटुंबाचें म्हणणें.
ह्या प्रकरणाचो तपास दक्षीण गोंय पुलीस अधीक्षक टीकम सिंह वर्मा, मुरगांवचे उपअधीक्षक गुरुदास कदम हांच्या मार्गदर्शना खाला तशेंच वेर्णा पुलीस निरीक्षक आनंद शिरोडकार हांच्या नेतृत्त्वाखाला उपनिरीक्षक महेश भोमकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
