भांगरभूंय | प्रतिनिधी
मडगांवः सावंतवाडी वचपी रेल्वेंतल्यान प्रवास करतना नेण्टो भुरगो मेळ्ळे उपरांत थिवेच्या रेल्वे सुरक्षा दळान चवकशी केली. तेन्ना तो भुरगो दिल्ली रावपी आनी ताचो बापूय ताका बडयता म्हणून पळून आयलो अशें ताणें सांगलें. आरपीएफान बाल सहायता केंद्राच्या सहकार्यान ह्या भुरग्याक अपना घरात धाडलो.
मडगांव सावन सावंतवाडी वचपी सावंतवाडी प्रवासी गाडयेंत रेल्वे सुरक्षा दळाच्या कर्मचाऱ्यांक 13 वर्सांचो भुरगो मेळ्ळो. ह्या वेळार सहाय्यक उपनिरिक्षक विजय पार्टे हांणी ताची चवकशी केली तेन्ना आपूण एकलोच भोंवता अशें ताणें सांगलें. तशेंच आपलें नांव राजू रहमान आनी नवी दिल्लीच्या शास्त्री पार्कांत रावता अशेंय ताणें सांगलें. ताचो बापूय परवेज आलम ताका बडयता म्हणून घरांतल्यान पळून आयिल्ल्याची म्हायती ताणें पुलिसांक दिली.
हाचे उपरांत रेल्वे सुरक्षा दळाच्या कर्मचाऱ्यांनी बाल सहायता केंद्राच्या कर्मचाऱ्यांच्या मजतीन भुरग्याक बाल कल्याण समिती कडेन दिलो. ते उपरांत भुरग्याक मेरशेच्या अपना घरांत धाडलो. ऑपरेशन नन्हे फरिश्ते खाला आनीक एका भुरग्याक सुरक्षीत दवरपाक थिवे रेल्वे सुरक्षा दळाक यश आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
