भांगरभूंय | प्रतिनिधी
पणजीः सध्या मुळाव्या शिक्षकांचीं 500 पदां कंत्राटी पद्दतीन भरल्यात. फुडल्या स म्हयन्यांत कर्मचारी भरती आयोग हीं पदां कायमस्वरूपी भरतले. फुडल्या काळांत आयोग वेगवेगळ्या खात्यांतलीं 2500 पदां भरतलो. तशेंच फुडल्या दोन वर्सांत मनीस संसाधन उदरगत म्हामंडळांत 500 जाणांची भरती जातली अशें मुख्यमंत्री डॉ. प्रमोद सावंत हांणी सांगलें. शुक्रारा पणजीत सेवा पखवाड्या निमतान 950 जाणांक नेमणूक पत्रां दिली. ह्या वेळार जाल्ल्या कार्यावळींत ते उलयताले.
उदका संसाधन मंत्री सुभाष शिरोडकर
ह्या कार्यावळींत पिवपाचे उदक मंत्री सुभाष फळदेसाय, खासदार सदानंद शेट तानावडे आनी हेर आमदार हाजीर आशिल्ले. ह्या वेळार नोकरी भरतींत पारदर्शकता हाडपा खातीर सरकारान गोंय भौशीक सेवा आयोग तशेंच कर्मचारी भरती आयोगाची थापणूक केल्या अशें मुख्यमंत्र्यान सांगलें. आयज ज्या लोकांक कंत्राटी नेमणूक पत्रां मेळ्ळ्यांत तांकां फुडल्या कांय म्हयन्यांत कायम नोकरी मेळटली. फुडाराक स्पर्धात्मक परिक्षेक पर्याय ना हें लक्षांत दवरप म्हत्वाचें. तरणाट्यांनी केंद्रीय लोकसेवा आयोग आनी बँकांच्या पदां खातीरय यत्न करचो. हे खातीर तांणी कॉलेजीच्या पयल्या दिसा सावन तयारी करपाक सुरवात करची.
तांणी सांगलें, गोंय मनीस संसाधन उदरगत म्हामंडळांत आयज 220 जाणांक नोकरी मेळ्ळ्या. फुडल्या दोन वर्सांत म्हामंडळांतल्या 5 हजार लोकांक नोकरी दिवपाचो आमी यत्न करतात. म्हामंडळाच्या कर्मचाऱ्यांक स्वाभिमानान जगपाची संद सरकारान दिल्या. तांकां हेर सरकारी कर्मचाऱ्यां प्रमाण सुटी, बोनस आनी हेर सुविधा दिल्यांत. ह्या कर्मचाऱ्यांक म्हामंडळा कडल्यान फुडल्या शिक्षणा खातीरय मजत मेळटा. हाका लागून म्हामंडळांत काम करपाक सोदपी लोकांचो आंकडो वाडत आसा.
लोकां खातीर काम करचें
आयज नेमिल्ल्या कर्मचाऱ्यांनी उमेदीन आनी मोगान काम करपाक जाय अशें मुख्यमंत्र्यान सांगलें. लोकांक मजत करपा खातीर आपूण वावुरतात हें तांणी लक्षांत दवरचें. कर्मचारी सारके वावुरल्यार लोकांक फायदो जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
